Gobierno a concede gremionan e reunion urgente riba seguridad!

ORANJESTAD - E reunion cu gremionan comercial y sindical a pidi urgentemente siman pasa, a keda otorga. NoticiaCla.com a haya confirmacion awe nochi cu e reunion ta tuma lugar diaranson awor 4'or di atardi na Edward Cheung Center. Gobierno na nomber di prome minister Eman a invita gremionan comercial y sindical pa e reunion aki. Durante e reunion aki, gobierno, ATIA, AHATA y FTA lo participa y wak con lo atende esaki. Segun presidente di sindicato FTA, Hubert Dirksz a bisa cu pa nan, e no ta un dialogo, sino mas bien FTA ta bay hala atencion di gobierno y exigi atencion urgente pa e problema di criminalidad y seguridad. 

REUNION PIDI

Tabata siman pasa diabierna cu gremio comercial y sindical a mustra cu nan tabata sumamente preocupa cu e desaroyo negativo cu ta tumando lugar den e ultimo simannan. Pa medio di un comunicado uni, nan ta pidi un reunion cu gobierno mas lihe cu ta posibel pa resolve e asunto aki.

PAZ Y TRANKILIDAD

Aruba ta conoci pa su paz y trankilidad cu ta un di e ingredientenan importante pa nos producto turistico, sinembargo e hechonan violento di ultimo dianan ta crea un nubia scur riba Aruba, cu ta ser considera como un isla unda su hendenan y esnan cu ta bishit'e ta custumbra di por ta tranquil y sigur. Cu e ultimo acontecimentonan aki a haci necesario pa nos bati alarma, specialmente ora e tendencia aki por afecta directamente e pilar economico principal di nos pais, esta nos turismo.

CRIMINALIDAD MUNDIAL

Nos sa cu criminalidad ta creciendo mundialmente y casi tur isla den Caribe tin di haber cu un indice di criminalidad sumamente halto. Esey no mester nifica cu na Aruba nos mester forma parti of tolera e tendencia aki, cu ta motibo cu gremio sindical y comercial ta haci un suplica na e gobierno di pais Aruba, cu ta principalmente responsabel pa seguridad riba nos isla, pa den un combersacion serio cu gremionan, informa di e pasonan cu lo bai wordo tuma pa frena di inmediato e tendencia sumamente negativo cu ta desaroyando riba nos isla. Nos sa cu nos cuerpo policial tin un bon record di soluciona crimennan na Aruba y cu medidanan ta wordo tuma pa entre otro revisa autonan, etc. den fin di siman, cu nos sa cu ta dunando resultado, pero ta mustra cu e medidanan aki so no ta suficiente.

REUNION URGENTE

Motibonan pakico gremionan ta pidiendo un reunion urgente cu esnan responsabel pa seguridad riba nos isla, ta pa intercambia idea, pero tambe wordo informa di e posibel accionnan pa trece un solucion y cambia e rumbo cu e pais aki ta tumando. Turismo ta sigur 85% di nos economia, cu ta nifica cu 85% di e pueblo trahador y comercio ta depende directo of indirectamente di e industria aki. Tiroteo y atraco full rond di Aruba ta inaceptabel, pero pior ainda si esaki ta tumando lugar dilanti nos area hotelero cu lo por tin e consecuencianan incalculable pa nos economia. Nos ta compronde cu no por frena criminalidad completo, y semper lo tin personanan cu ta kere cu nan por cana arma of comete robo of atraco. E situacion aki ta rekeri un atencion urgente, pa cual motibo nos ta haci un apelacion pa tur medida na disposicion di husticia, incluyendo nos leynan, wordo uza pa preveni y frena a lo maximo e tendencia aki. Aruba ta enfrentando varios reto.

ILLEGALNAN

Un di nan ta e gran cantidad di personanan cu ta yegando ilegal of ta keda ilegalmente na nos isla for di paisnan cercano cu ta wordo considera paisnan peligroso na mundo. Relaciona cu e criminalidad cu ta aumentando na Aruba, un di nos preguntanan ta, kico nos ta haciendo pa evita e brote di criminalidad cu ta yegando for di e paisnan aki? “Nos ta spera cu mas lihe cu ta posibel ricibi un reunion cu caracter di urgencia cu e ministernan concerni pa atende cu e preocupacion cu henter e pueblo aki tin”, e gremionan ta finalisa bisando.