E siman aki gobierno ta entrega ley AFT na parlamento

ORANJESTAD – E concepto di ley pa Comision Supervision Financiero Aruba, LV AFT lo ta cla ‘den cuestion di dia’. Asina fuentenan serca di e proceso den gobierno, a sigura NoticiaCla.com dialuna merdia. “Nos ta den den e ultimo fase di ahuste” e fuentenan a sigui bisa. E fecha exacto sinembargo, ainda no por wordo duna, pero ta casi sigur cu ta e siman aki si. “E ley lo ta cla dentro di poco pa wordo presenta na parlamento”. Unabes cu esey sosode, e proceso por cuminsa cana pa trat’e y despues tambe pas ‘e. Gobierno a bisa caba cu nan no ta mira e problema cu e tardansa aki, ya cu segun minister di finanza Angel Bermudez, e ley lo drenta na vigor cu forza retroactivo. Gobierno di Reino ta sceptico, pero a mustra tambe cu dia 4 di september proximo durante e siguiente reunion di conseho di minister di reino, nan lo evalua 'si Aruba a logra esaki'. 

TRATAMENTO

Unabes cu e ley drenta parlamento, e proceso di trata esaki ta cuminsa, manera manda pregunta riba e ley pa ministernan contesta, trata esaki den comision central etc. Den combersacion cu presidente di parlamento Marisol Lopez Tromp a bisa NoticiaCla.com dialuna atardi, ‘tur ta depende kico statenleden dicidi den comision central y cuanto tempo mester pa studia e ley y prepare den debate’.

SCHEMA

“Tin un schema prepara pe proximo simannan cu diferente begroting/ leynan pa trata den reunion publico. E diferente ministernan ta invita caba riba e fechanan ey, ya cu nan tambe tin nan planning y Staten tambe” Lopez a sigui bisa.

TEMPO PA TRATA LEY

Segun Lopez Ora cu un ley drenta, den un comision central e statenleden lo determina hunto cuanto tempo ta bai tin mester pa studie ley aki y pa prepara nan preguntanan pa Gobierno. E preguntanan aki lo bai pa Gobierno contesta. Depende cuanto tempo Gobierno tuma pa contesta” e mandatario a sigui bisa. No ta conoci si unabes cu e ley drenta e siman aki, cu lo hala e otro leynan un banda y trata esaki prome, teniendo na cuenta e ‘urgencia’ cu esaki tin. Tabata apenas algun siman pasa cu gobierno hulandes a confirma na NoticiaCla.com cu dia 4 di september den conseho di minister di reino hulandes, nan lo determina e progreso di Aruba riba e ley aki. Gobierno di reino hulandes tin instrumentonan na su poder pa usa pa sanciona Aruba si e ta sinti cu e isla no a cumpli cu e protocol manera firma 2 di mei ultimo.