Caribbean Journal: Mas di mei miyon turista a bishita Aruba caba

ORANJESTAD – Aruba ta e destinacion caribense cu mas ta creciendo cu cualkier otro destinacion den Caribe. Esaki ta basa riba e portal Caribbean Journal (CJ). Mientras cu e cifranan di Aruba e ta ricibi di e isla mes, e comparacion cu otro isla ta bin di CJ mes. Ta papia di un aumento di 16,2% den e prome mitar di aña di 2015. Na tur, ta papia di 569,153 bishitante pa nos isla den e prome 6 luna di 2015.

AUMENTO

Segun CJ, parti di e aumento ta debi na un aumento di 19.7% di turismo di invierno cu sigur ta algo positivo. CJ ta raporta di a ricibi e cifranan aki di Caribbean Tourism Organization, (CTO) cu na su turno ta haye di Aruba Tourism Authority Den combersacion cu CEO di ATA, Ronella Tjin Asjoe, e a confirma e informacion. Segun Tjin Asjoe, e cantidad di turista cu a yega Aruba e prome 6 luna, tabata 489,871 turista. Esaki no ta inclui pasaheronan di crucero, sino solamente ‘stay over tourists’. E informacion mas sigur segun Tjin Asjoe, ta registra via e carchinan di turista ora cu cada turista yega Aruba. E siguiente destinacion cu a conoce un crecemento halto, ta Barbados, cu 15.3% di aumento. Pa tene esaki den contexto, e cantidad di ‘stayover’ tourists pa henter 2014, tabata 1,072,082. Pues algo mas cu mei miyon pa aña.