Hulanda y otro paisnan Europeo ta pone nan mes banda di Dinamarca y Groenland

DEN HAAG - Hulanda ta pone su mes banda di “nos amigunan Danes” tocante Groenland. Asina   minister demisionario Van Weel di Asuntonan Exterior a scirbi riba X. “Tocante futuro di Groenland, ta na man di Dinamarca y Groenland mes pa dicidi riba esaki.” Poco despues di e declaracion di Hulanda, tambe a sali un declaracion hunto di lidernan Europeo. Den e declaracion ey tambe ta bisa cu futuro di Groenland y Dinamarca ta den man di nan mes. Na mes tempo, ta wordo enfatisa cu seguridad di region Arctico tambe ta un asunto di NAVO y cu Merca ta un aliado importante den esaki. Ademas di prome minister Danes Frederiksen, presidente Frances Macron, canciller Aleman Merz, prome minister Britanico Starmer, prome minister Italiano Meloni, prome minister Spaño Sanchez y prome minister Polaco Tusk a firma e declaracion.

POSICION STRATEGICO

Presidente Mericano Trump ta uza palabra amenazante regularmente direccion Groenland, cu e ta bisa cu e kier anexa. Diadomingo e  la bisa cu Merca “absolutamente mester” Groenland, pa motibo di seguridad y e posicion strategico. Van Weel no ta menciona Merca den su mensaje riba X, pero e ta scirbi cu Hulanda ta “encuraha dialogo y cooperacion” entre aliadonan di NAVO pa “reforsa nos seguridad” riba Groenland.

200 AÑA

Groenland ta parti di reino Danes ya mas of menos 200 aña, pero desde 1979 e tin cierto autonomia. E pais tambe tin su propio gobierno, pero Dinamarca ta responsable pa, entre otro cosnan, defensa y asuntonan exterior. Mayoria di habitantenan di Groenland, sinembargo, kier eventualmente bira independiente di Dinamarca. Prome minister Danes Frederiksen a bisa ayera cu un atake Mericano contra un aliado di NAVO lo ta desastroso. “Si Merca  dicidi pa ataka un otro pais di NAVO, tur cos lo para,” segun Frederiksen. “Esaki ta aplica tambe pa NAVO y asina pa e orden di seguridad internacional di postguerra.”