Pareha turista cu a fayece tragicamente, a habri aña ainda ‘felizmente’ na Aruba

ORANJESTAD – E pareha mericano cu a fayece diadomingo mainta na na nan hotel di hospedahe St Regis, algun dia ainda tabata felizmente disfrutando di nan vacacion na Aruba. Por lo menos, asina e raportahe fotografico riba nan pagina di Facebook cu nan tabata comparti, tabata mustra y indica. Si esey tabata un farce publico, no ta conoci. Dialuna atardi, cuerpo policial a divulga e identidad di e pareha, cu a resulta di ta Boris Jozic (45) y su casa Cristina Jozic (52). Ambos mericano nacionalisa pero original di Bosnia y Filipinas. Ambos a muri un morto tragico manera cu Noticiacla a raporta diadomingo atardi.  Manera polis a informa, a haya e homber abou tira na suela, despues cu e lo a tira of bula of cay for di e ultimo piso di hotel. Con e la cay ainda, no ta sigur pero, di e informacion cu tin, tur cos ta mustra cu e lo a tira su curpa, despues di a mata su casa, of a haya su casa morto.   Pa loke ta e datonan personal di e pareha cu polis a suministra dialuna, ambos ta comparti e mesun fecha di nacemento, pero 7 aña apart.  

VACACION

E pareha tabata hunto y enamora, disfrutando di nan vacacion na Aruba y a habri aña na Aruba den un forma festivo na Moomba Beach, unda cu nan a comparti varios foto di nan celebracion di aña nobo. Segun e ultimo post di e pareha, nan a scirbi ‘ Terminando aña cayente, contento, y un tiki mima.  Anochinan di Aruba + vibes pa semper!’.  Niun indicacion di problema entre nan dos. Hasta un potret unda cu nan ta sunchi otro pasionadamente. Investigacion mester saca afo kico a pasa e anochi prome, kico a bay robez pa e caba asina dramatico y tragico.

TRABOU

E pareha tabata opera un gym na Wilmette, Illinois, ‘Steel Fitness Club’ unda cu e homber ( y posiblemente e casa) tabata doño y entrenador personal di e facilidad. Varios potret ta mustra nan dos hunto den e gym. Nan a casa desde November 2018.