Un biaha mas RIU ta hiba mediado corte pa para referendum

ORANJESTAD – RIU hotel ta hiba mediado di gobierno corte mayan atrobe, pa motibo di referendum pa departamento di housekeeping. Presidente di sindicato FTA, Hubert Dirksz a confirma esaki awe mainta pa NoticiaCla.com. Segun e lider sindical, -mescos cu a haci den un caso anterior-, e hotel ta sinti cu no por tene un referendum den e forma cu ta haciendo esaki y como tal kier pa huez para esaki. E intencion ta pa e referendum tuma lugar dia 19 di augustus proximo.

CASO ANTERIOR

Den pasado caba, RIU a hiba e mediado corte caba pa para tres referendum na e hotel. Cada referendum tabata pa diferente departamento di e hotel. Mientras cu RIU a argumenta cu no tin problema pa sindicato drenta, pero no e forma cu nan kier hacie, huez a dicta na fabor di e mediado ultimo biaha. E sentencia a conduci cu a tene e referendumnan. Pero pa malasuerte di e sindicato e tempo ey, e trahadonan di housekeeping no a gana e referendum, cu a pone cu, -cu excepcion di e otro dos referendumnan gana-, e departamento ey a keda sin representacion sindical. E opcion tabata e ora pa tene un otro referendum. Y awor esey ta programa pa tuma lugar otro siman.

ABOGADO WIX

Abogado di RIU, Ronny Wix a confirma cu mayan mainta 9’or e caso ta tuma lugar, pero no kier a bay den detayes, sino a mas bien referi na e caso mes mayan mainta. Unico cos cu e la declara, ta cu 'e casonan ta diferente'. NoticiaCla.com lo keda pendiente pa e caso aki.