Reliefweb: Tin mas di 11 mil imigrante y refugiado venezolano bibando na Aruba

MIAMI/ORANJESTAD – Segun e estadisticanan cu ta wordo mustra tocante refugiado y migrante for di Venezuela den e 17 paisnan di e Respuesta R4V di reliefweb, tin mas di 11 mil venezolano bibando na Aruba, reparti entre imigrante y refugiado. Corsou tin casi mitar cu algo mas cu 6 mil venezolano (imigrante y refugiado). E ta refleha un cifra oficial cu ta wordo emiti pa e gobernonan anfitrion respectivo segun e instancia menciona. E uso y publicacion di nan pa productonan di R4V ta wordo coordina di manera cera cu e oficinan estadistico gubernamental relevante y/o otro departamento gubernamental nacional cu ta responsabel pa e maneho di estadistica di refugiado y migrante.

E estadisticanan aki ta wordo actualisa periodicamente. Tin gobiernonan cu ta actualisa nan mensual, mientras cu otro ta haci esaki cu no ta claramente defini. Como resultado, un aumento den e cifra raporta for di un publicacion di R4V di un luna pa e siguiente den un pais especifico por parse como un aumento significativo den yegada di refugiado y migrante for di Venezuela, mientras cu na realidad, esaki ta relaciona mayormente cu e procedimiento di raporta y publicacion di e pais anfitrion mes.