Warda Costa ta mira presion continuo halto di traficacion di droga y di hende

DEN HAAG – Traficacion di droga y di hende lo keda un problema di seguridad structural pa e parti caribeño di e Reino durante 2026. E Warda Costa pa e Reino di Hulanda ta bisa den su plan anual 2026 cu no tin ningun senal cu e problema ta baha y cu e esfuerso pa control y opsporing riba laman lo keda halto sin interrupcion.

Segun e Warda Costa, e region caribeño ta vulnerabel pa motibo di su posicion geografico entre paisnan di Sur y Centro America unda droga ta wordo produci, y e mercadonan grandi na Norte America y Europa unda e droga ta bay. Specialmente e islanan ABC ta wordo usa como ruta di paso, loke ta causa presion continuo di organisacionnan criminal internacional. Traficacion di hende y trata di hende via laman tambe ta keda un punto di preocupacion importante.

E Warda Costa ta indica cu mas o menos ochenta porciento di su capacidad disponibel ta wordo usa di manera planifica pa trabou di husticia. E atencion principal ta riba combate di transporte di droga, traficacion di hende, comercio ilegal di arma y terrorismo, riba encargo y bou di autoridad di e ministerionan publico di e paisnan.

Den e plan anual ta wordo aclara cu e problema ta structural y no ta un situacion temporal. Pesei, e Warda Costa ta concentra riba control di largo plazo, trabou guia pa informacion y cooperacion intenso cu partnernan local y internacional, manera polis, aduana y serviciunan di seguridad di otro pais.

Cu e accionnan aki, e Warda Costa kier evita cu rednan criminal haya mas control den e parti caribeño di e Reino y ta sigui traha pa limita e riesgo di seguridad pa e islanan y pa hende cu ta biba riba nan.