Riba un solo dia a raporta mas cu 40 cacho perdi caba na Aruba!

ORANJESTAD- Si ‘normalmente’ tin promedio di 50 cacho ta perde pa siman durante temporada di clapchi na Aruba, e aña aki cos a bira mucho mas pio. Segun e persona cu ta maneha e pagina di Facebook Lost and Found Pets Aruba, Angela Tiemens, cos ta for di control, unda cu riba un solo dia, a raporta no menos cu 43 cacho perdi. Y esaki ta riba un solo dia. Y ta e di dos dia cu temporada di benta y tiramento di clapchi a cuminsa. Esaki ta mustra e seriedad cu tin di clapchi na Aruba relaciona cu nos mascotanan.

LOST AND FOUND PETS ARUBA

Tiemens a inicia e pagina aki mas di 10 aña pasa, na 2014, unda cu di un forma completamente voluntario, ta registra cachonan cu perde. “Mi ta sacrifica, completamente voluntario y cu amor pa e hende y e bestianan di Aruba, ora tras ora tur dia pa haci posible cu tur animal por bolbe cas cu su famia. Mi ta haci esaki cu amor, pero a yega tempo pa cambio” Tiemens ta bisa awor. Segun Tiemens, ta tempo pa pone e tradicion bou di lupa y pa duna e mentalidad riba e isla un buen sacudi.

TEMPORADA EXTENDI?

Manera cu noticiacla a raporta anteriormente caba, e temporada di benta di clapchi ta cuminsa dia 27 di December di tur aña y ta termina dia 1 di januari di e siguiente aña pa 1or di merdia. Problema ta cu hende no ta tene nan mes na e ley aki. Tiemens ta confirma esaki tambe den su post e siman aki. “ Clapchi na Aruba ta wordo tira for di 27 di december y usualmente ta dura te mas o menos 10 di januari” pues e ta confirma cu ta pasa e fecha cu sigur 10. Na tur, e periodo di clapchi ta nifica mas o menos 15 dia di clapchi. “15 dia yen di sufrimento pa hende y pa bestia” Tiemens ta sigui bisa. 

ADAPTA TRADICION

Tiemens ta pidi awor, pa adapta e asina yama tradicion. Y fuera di esaki, ta haci un yamada na autoridad pa pone hende cumpli cu e ley tambe. Sino ta tanto bal. “No ta bira tempo pa adapta e tradicion y tambe pa haci hende cumpli cu e ley? Clapchi ta bunita, pero no lo ta aun mas special si nan lo tira solamente riba 31 di december y 1 di januari? Dos dia. Mescos cu na Boneiro. Esaki ta tur loke mi ta pidi” Tiemens ta pidi. Segun Tiemens, tradicion ta pa honra, no pa wordo usa como excusa pa terrorisa e isla pa dos siman”. Segun e persona en cuestion, adapta, haci cumpli y aun asina celebra un fiesta. “No por ta asina dificil. No tin mester pa discuti ora y ora  Pone esaki riba agenda, ataca e problema y regla esaki. Den e prome cuartal di 2026, pa cu na december di aña cu ta bin nos ta mihor prepara. Tiemens ta bisa tambe cu no ta p’e mester hacie. “ Pero regla esaki pa e bestianan y pa e hende riba nos isla. Haci esaki pa nan”.

ENCUESTA

Noticiacla den pasado a haci encuesta riba e tema, y cada bes e encuesta tabata sali mescos. Cu nos isla ta dividi riba e tema. Casi 50%. Mitar di esnan encuesta, ta bisa cu mester sigui cu e tradicion manera cu e ta, y otro 50% ta bisa pa elimina e tiramento completo, of haci esaki solamente como tipo di show door di companianan professional, manera cu tabata haci antes. Hulanda, y otro paisnan a cuminsa adapta nan regla y leynan riba e tema. E aña aki na Hulanda, ta e ultimo biaha cu por tira clapchi den forma ‘priva’. Otro aña esaki ta bira illegal, cu ta nifica cu no por bende clapchi mas na comunidad.