Maduro: Ta spera otro ministerionan di gobierno tambe haci donacion pa EPI

ORANJESTAD - Ryan Maduro, decano di asuntonan di studiante di EPI unidad di hospitalidad y turismo, ta spera cu e tipo di sorpresanan den forma di inversion por bin tambe di otro ministerionan y di sector priva tambe mirando cu colegio EPI ta sirbi e necesidad di industria, di trabou y tur loke ta pasando na Aruba, pasobra e scol ta uno di formacion profesional.

CONTENTO CU DONACION

Maduro a mustra con contento e sector aki a keda cu e gesto cu Minister Otmar Oduber y e partnernan den turismo tabatin diabierna mainta, na ocasion di su hacimento di aña. Ta asina cu despues di a haya un recorido y presentacion di e situacion di e unidad aki di EPI, Minister Oduber a reuni brevemente cu e partnernan presente y conhuntamente cu ATA a dicidi di realiza un inversion di mey miyon Florin den e sector importante aki di educacion pa nos futuro trahadornan den turismo.

BUELTA POSITIVO

Pa loke ta sector di hospitalidad y turismo, Sr. Maduro ta bisa cu e donacion ta trece cune un buelta positivo pa nan intencion pa loke ta educacion. E ta bisa cu nan tin mas cu 30 aña na Aruba dunando educacion riba e nivel aki pa e studiantenan di hospitalidad y turismo, a presenta diferente lidernan den e industria, entre nan Minister Otmar Oduber, kende ta un graduado di e scol.

OPINION

E ta di opinion cu si en berdad kier duna Aruba e miho dibo, mester cuminsa cu educacion di calidad. “Mi ta kere cu esaki ta e compromiso na educacion di calidad na Aruba. Hopi di e inversionnan ta bay wordo haci pa infrastructura, pero e ta un stap pa yuda nos cu e licencia cu nos tin, pasobra mi ta kere cu pa bo por draai un programa di tal magnitud y di tal nivel academico bo mester di e infrastructura y mi ta kere cu awor cu e compromiso di inversion di mey miyon den infrastructura e ta bay haci un diferencia hopi grandi”, Ryan Maduro a conclui.