Wardacosta ta mira riesgo di seguridad permanente door di Venezuela

ORANJESTAD /DEN HAAG – Wardacosta pa Reino di Hulanda ta conta explicitamente na 2026 cu riesgo di seguridad persistente pa e islanan Caribe como consecuencia di e crisis na Venezuela. Esaki ta den e plan anuanl 2026 di Wardacosta, cu a wordo aproba door di Rijksministerraad.

Den e documento ta wordo adverti cu e inestabilidad politico, economico y humanitario na Venezuela ta tin un efecto directo, principalmente riba e islanan ABC.

Segun Wardacosta, Venezuela ta keda un factor impredecible den e region. E relacion tenso entre Caracas y e Reino, entre otro paso cu Hulanda no a reconoci e victoria electoral cu presidente Nicolas Maduro ta reclama di 2024, ta aumenta e incertidumbre. Mas inestabilidad por conduci na mas presion migratorio direccion e islanan y na un aumento di criminalidad transfronterizo.

Ademas, Wardacosta ta indica riba e tensionnan creciente entre e Merca y Venezuela den e region Caribe. E desarroylonan geopolitico aki por tin consecuencia pa e situacion di seguridad rond di e islanan ABC. Wardacosta ta sigui e desarroyonan aki di cerca y ta tuma nan na cuenta na e uso di su medionan y personal na 2026.

E plan annual ta reconoci cu e situacion di seguridad den e region ta structuralmente bou di presion y no ta un asunto temporal. Pesei, Wardacosta ta keda alerta pa posible consecuencia pa e seguridad maritimo y e stabilidad den e parti Caribe di e Reino.