Gobierno a fia 127 miyon dollar di banco suizo

ORANJESTAD – Gobierno di Aruba diadomingo anochi a confirma cu nan a fia e suma di 127 dollar for di e banco suizo, Credit Suisse, pa cubri presupuesto 2015. Despues cu na Mei ultimo parlamento a aproba e presupuesto y consecuentemente Cft a conseha positivamente riba e financiamento, diabierna ultimo Ministro di Finanzas Sr. Angel Bermudez a formalisa e financiamento di e presupuesto 2015.

APROBACION DI HULANDA

Siguientemente e mandatario a busca aprobacion di conseho di minister di Reino pa un fiansa riba mercado internacional y despues cu e conseho di Reino a aproba esaki dia 12 di Juni ultimo Bermudez cu e expertonan di Directie Financiën a haci un gira na Europa pa sondea e mercadonan.

OFERTA DI CREDIT SUISSE

Finalmente e mandatario di finanzas a haña un oferta atractivo di Credit Suisse pa un suma total di US$ 127 miyon. Diabierna mainta gobernador a firma e decreto pa autorisa e fiansa aki, di cual e suma di US$ 85 miyon lo ta disponibel directamente. Segun splicacion di Bermudez, e resto di suma aki lo ta disponibel mas den aña ora cu e ta necesario.

PLAZO DI PAGO

Ademas e fiansa aki lo mester wordo paga den añanan benidero te cu 2022. Minister Bermudez ta satisfecho cu a logra realisa e fiansa pa e deficit presupuesta p’e aña aki. Segun e mandatario, esaki ta demostra e confiansa cu tin den pais Aruba.