Escritor Dufi Kock: Felicitacion na Archivo Nacional Aruba cu 20 aña di existencia

ORANJESTAD - Diabierna, dia 1 di augustus, Archivo Nacional Aruba, oficialmente ta cumpli 20 aña di existencia. Un archivo cu a cuminsa for di nada na aña 1988. “Danki na e vision di Sr. Cisco Martis (qepd), Sra. Trudy Hassell y Sr. Vito Petrocchi, pa menciona algun, cu mi ta compronde cu tabata e pioneronan e tempo ey” ta palabra di sr Dufi Kock, escritor y historiado arubano. Un archivo cu a cuminsa den e edificio di ex-Rialto na Steenweg na Playa unda cu pa prome biaha e la bishita. Pero no a dura mucho cu e volumen di e archivo historico aki a rekeri un luga mas espacioso y adecuado. Awe e ta ubica den e edificio di ex-Wimco, Sabana Blanco 60, un luga mucho mas sigur, mas espacioso pa asina tanto documento y alaves un luga espacioso cu tin tur comodidad pa cualkier persona cu kier bishit’e.

“Den mi trabou como un escritor y historiado, frecuentemente mi ta bishita e archivo aki, sea pa mi busca of coopera cu informacion, y mi mester bisa cu cada biaha cu mi bishit’e, mi ta mira solamente un progreso ambicional na e departamento aki” Kock a bisa. Sr. Raymond Hernandez, Director, y su staff bon cualifica ta hacienda un tremendo trabou pa mantene y preserva documentonan historico di nos pais. Adicionalmente nan ta tene exposicionnan anualmente pa asina mantene nos cultura bibo y alaves duna nos hendenan di conoce cu Archivo tey pa un y tur. Tur e esfuersonan aki y e dedicacion di e staff completo ta pa sigura cu nos pueblo tin un archivo y un bon fuente di informacion pa tur esnan cu tin mester di dje.

“Finalmente, pa medio di e comunicado aki, mi kier tuma e oportunidad aki pa extende un palabra di felicitacion na Sr. Raymond Hernandez y su staff completo na e ocasion di 20 aña di existencia di Archivo Nacional Aruba. Alaves mi gradicimento pa e cooperacion di semper brinda na mi persona. Pabien y sigui cu e bunita trabou pa engrandece e fuente di informacion aki pa nos comunidad pero muy especial pa nos futuro generacion” Kock ta finalisa bisando.