Guinness ta reconoci Corsou como e pais mas chikito cu a yega Copa Mundial di futbol

LONDEN – Guinness World Records a reconoci oficialmente Corsou como e pais cu menos habitante cu a clasifica pa FIFA World Cup 2026. E reconocemento ta conecta directamente cu e clasificacion historico pa e Mundial di futbol 2026. Corsou a sigura su ticket pa e Copa riba 19 di november 2025 cu un empate di 0-0 contra Jamaica na Kingston. Na momento di e clasificacion, e isla tabatin 156.115 habitante, cu segun Guinness ta establece e record. E seleccion, bou di direccion di Dick Advocaat, a termina como ganador di grupo den e di tres ronda di clasificacion di CONCACAF y a keda invicto, cu tres victoria y tres empate. E empate na Kingston tabata suficiente pa logra clasificacion. Cu e reconocemento aki, e paso deportivo di Corsou ta haya un dimension internacional extra: e isla no solamente ta inscribi su nomber riba e escenario mas grandi di futbol mundial, sino tambe den e buki di recordnan mundial.