Situacion di accion na Cool Casino a escala awe nochi

ORANJESTAD – Despues cu un grupo di trahado di Cool Casino na Riu Palace a manifesta for di awe tardi 3’or, anochi nan a wordo confronta pa un grupo di polis, cu segun e sindicato FTA, a wordo yama pa e gerente di e casino. Segun e sindicato su presidente Hubert Dirksz, e gerente lo a suspende e trahadonan cu a welga ayera nochi. Pero e gerente a desmenti esey mas tempran na NoticiaCla.com. “No ta berdad” e gerente a sigui bisa. E la admiti si cu e trahadonan ayera lo a ‘sera mesa cu cliente na mesa’. Awe nochi cos a bay for di man ora cu dado momento polis a yega pa sea core cu e trahadonan of manda nan bay traha bek. Despues e trahadonan a calma y a bay cas.

ACCION ATARDI

For di atardi 3’0r e sindicato a notifica cu e trahadonan ‘ta den accion, despues cu e trahadonan a protesta ayera nochi pa sostene tres trahado cu a wordo suspendi inhustamente’. Segun e presidente di e sindicato, Hubert Dirksz, ‘e trahadonan ta mustrando boluntad pa traha, pero e casino lo a ‘lock nan out’ bisando e trahadonan cu a protesta ta keda suspendi till further notice’. Mientrastanto e ta buscando trahadonan di otro empresa pa traha pa asina intimida esnan cu a protesta. “Awor e accion a escala” Dirksz a sigui bisa. E gerente mientrastanto ta sigui nenga cu ta ‘intimidando e trahadonan’.

PRESENCIA DI POLIS

Pa 10’or e sindicato a tuma nota di e presencia di polis y lo kier a core cu esnan protestando. “Gerencia a manda polis pa core cu nan pero despues di a papia cu nan, cos a calma” e sindicato su abogado a sigura NoticiaCla.com. Awe nochi NoticiaCla.com a acerca e gerente di e casino un biaha mas pero no a logra haya reaccion e biaha aki.