Schiphol y KLM diadomingo tambe tabata ocupa cu entrega di maletanan despues di un ‘storing’

SCHIPHOL - Schiphol diadomingo tambe, hunto cu companianan di aviacion, continuamente tabata ocupa cu e entrega di tur e maletanan cu a keda atras riba e aeropuerto diabierna despues di e storing, segun un vocero. Aruba tambe por tabata afecta mirando cu e salida number 2, ta wordo usa tambe pa buelonan pa Aruba, Corsou y Bonaire. Un vocero di KLM a bisa cu e compania di aviacion a entrega caba un cantidad considerable di maletanan y cu dia y anochi nan ta traha intensivamente riba esaki.

Schiphol a enfrenta diabierna un storing technico den e sistema di bagage na sala di salida 2. Como resultado, segun e aeropuerto, mas o menos 20.000 maleta a keda atras. Schiphol y KLM no sa aun cuanto maleta a wordo entrega bek caba, pero nan ta spera cu esaki lo dura algun dia mas. “Nos ta haci tur cos posibel hunto cu companianan di aviacion pa entrega tur e bagage na e biaheronan lo mas lihe posibel,” asina un vocero di Schiphol a bisa.

Durante e storing, mester a procesa e maletanan di sala di salida 2 manualmente, loke a dura mas tempo. P’esey no tur maleta   por a bay hunto cu e vuelonan. Ta te na fin di e atardi Schiphol a anuncia cu e storing tabata resolvi. E causa preciso no tabata conoci  .

“Nos ta lamenta e inconveniente hopi pa e biaheronan cu a wordo afecta pa esaki,” e vocero di Schiphol a bisa diabierna. Riba un dia manera diabierna, e aeropuerto normalmente ta procesa mas o menos 150.000 maleta.

Schiphol a aconseha e biaheronan diabierna pa tene bista riba e canalnan online di nan compania di aviacion pa mas informacion. KLM a anuncia e mesun dia cu su biaheronan tambe a wordo perjudica pa causa di e storing.