Aruba ta amplia supervision di aviacion, tambe inspectornan externo ta permiti

ORANJESTAD – Aruba ta amplia e supervision riba aviacion door di haci posible cu organisacionnan externo tambe por wordo nombra como inspector special. Esaki ta para den un regla ministerial cu a wordo publica 16 di December 2025 y cu ta drenta na vigor 1 di januari 2026.

Te awor, principalmente ambtenarnan di e Directie di Aviacion tabata wordo usa pa haci inspeccion y evaluacionnan. Cu e regla nobo, e director di e Directie di Aviacion ta ricibi e autoridad pa nombra, ademas di personanan natural, tambe personanan huridico como inspector special. Cu esaki, e supervision ta wordo amplia y e trabao mester por wordo haci di manera mas eficiente.

E inspectornan cu wordo nombra por, entre otro cosnan, tuma pruebanan di capacidad di personal bulado, haci investigacion na companianan di aviacion Arubano y institucionnan di formacion, y tene supervision riba medionan di entrenamiento, sistemanan di nabegacion y cartanan di aviacion. Nan tambe por wordo usa pa controlnan technico di avionnan Arubano den marco di entrega of prolongacion di certificadonan di aeronavegabilidad.

INSPECCIONNAN TECHNICO

Pa inspeccionnan technico, organisacionnan mester dispone di un certificado valido pa maneho di mantencion di aeronavegabilidad permanente, entrega door di un estado miembro di e Agencia Europeo pa Seguridad di Aviacion of un instancia equivalente. Segun e explicacion di e regla, e ampliacion tin como meta pa organisa e supervision di manera mas flexible y mas eficaz, sin pone na riesgo e seguridad den aviacion.