Corsou no ta raporta cancelacion di buelo ni hotel debi na situacion den Caribe

WILLEMSTAD - No tin kanselashon di reservashon ta tuma lugá. Ni di buelonan rumbo pa Kòrsou ni na hotèlnan. Asina minister Roderick Middelhof ta konfirmá den deklarashon pa EXTRA. E minister ta bisa ku e ta den kontakto ku e partnernan mas importante den sektor turístiko ku ta Curaçao Tourist Board (CTB) i Curaçao Hospitality & Tourism Association (CHATA) i ku no tin informashon ku debí na e situashon di tenshon den region ta kanselá buelonan i reservashon pa hotèl na Kòrsou. Pa loke ta e lus negativo ku Kòrsou ta aden relashoná ku e notisianan internashonal, Middelhof ta bisa ku ta pa e motibu akí el a saka un komunikado na hulandes i ingles pa sigurá ku Kòrsou ta un destinashon i sigur i ta habrí pa negoshi.

E minister a manda su komunikado pa prensa internashonal tambe, pero e ta indiká ku ta na prensa pa públiko e informashon di gobièrnu di Kòrsou. E ta bisa ku gobièrnu di Kòrsou ta hasi tur lokual ta na su alkanse pa mantené trankilidat den sektor di hospitalidat. E minister ta atmití sinembargo ku ta trata di un tema delikado i importante pa Kòrsou.

“Loke gobièrnu sa ta loke tur hende por lesa den medionan di komunikashon internashonal, esta ku Merka ke pone un blokeo kompletu kontra di tankeronan ku zeta klandestino venezolano, aunke ku ainda no ta mira mashá tumando lugá.” Pa loke ta moveshonnan aéreo e minister ta bisa ku úniko informashon ku tin ta ku e kompania hulandes, KLM a indiká ku nan ta bula ku tur nan lusnan sendé ora nan drenta espasio aéreo di Kòrsou pa asina nan ta visibel komo un buelo komersial i ku djamars un buelo di Corendon a keda tera na Boneiru. “Gobièrnu ta sigui e desaroyonan ku wowo di falki pasobra e konsekuensianan por ta negativo pa e sektor ekonómiko mas importante di Kòrsou ku ta esun di turismo.”

E ta enfatisá ku Kòrsou komo destinashon no ta un peliger i ta referí na su deklarashon emití djamars último. “E koordinashon akí ta esensial pa garantisá un komunikashon transparente, na tempu i un aserkamentu koordiná den direkshon di merkadonan internashonal i esnan ku ta bishitá Kòrsou. No tin problema ku seguridat ku ta di influensia riba e espasio aéreo di Kòrsou òf ku ta influensiá operashonnan di aeropuerto. Ta atendé eventual insidentenan den e ‘Flight Information Region’ (FIR) di Kòrsou konforme e prosesonan internashonal establesé i outoridatnan kompetente ta vigilá esakinan kontinuamente.”

Mas aleu el a indiká ku e ta tuma seguridat i bienestar di tur ku ta bishitá Kòrsou hopi na serio. Kòrsou ta yama bishitantenan for di tur skina na mundu bon biní i ta ansioso pa risibí nan ku hospitalidat, stabilidat i kuido, loke Kòrsou ta konosí p’é. NOTA: Texto ta scirbi den papiamento fonetico di Corsou.