Barco crucero a ‘skip’ Corsou pa motibo di seguridad den region

WILLEMSTAD -E barco crucero Norwegian Epic no a a mara diamars den haf di Corsou. E barko di Norwegian Cruise Line, cu riba mas o menos 4200 pasaheronan y 1700 miembronan di tripulacion, a kita Corsou na ultimo momento for di e ruta pa motibo di preocupacion tocante actividadnan militar den e region. Asina e portal hulandes NOS ta raporta. Esaki ta e prome biaha desde e pandemia di corona cu un barco crucero ta pasa Corsou pa razon di seguridad.

Segun Norwegian Cruise Line, a dicidi pa tuma precaucion extra pasobra tin ehersicionan of operacionan militar riba laman den proximidad di e ruta di navegacion planifica. Cua ehersicionan ey exactamente ta trata di nan, e compania naviero no a splica. Norwegian Epic a sali dialuna atardi for di Aruba y awor e ta na caminda pa Barbados. 

E decision ta yega riba un momento delicado pa Corsou. E temporada turistico halto a caba di cuminza y e autoridadnan ta trata activamente pa enfatisa e imagen di e isla como un destino di biahe sigur.

Den ultimo dianan, Corsou tabata den foco internacional pa varios casi-incidente den espacio aereo, kaminda avionan militar mericanonan sin transponder visible a hinca e trafico aereo comercial. Den dos caso, pilotonan a raporta cu nan a pasa riba distancia hopi chikito for di un avion militar.