Yrausquin: Parlamento mester vota contra ley AFT y pasa medida

ORANJESTAD – Parlamento tin cu vota contra e ley pa supervision financiero conoci formalmente como LV Aruba Financieel Toezicht (AFT), aunke cu e ta di Aruba mes. Mes momento mester acepta e medidanan pendiente pa sigura futuro financiero sano di Aruba. Ex minister di finanzas Juan David Yrausquin a confirma na NoticiaCla.com awe mainta cu enberdad su ‘stemadvies’ ta pa no vota pro AFT, y pasa medida. “Uno sin e otro, no ta posibel” Yrausquin a sigui bisa den un entrevista cortico y in usual.

PAKICO CONTRA

E ex minister, algun dia prome cu e bandona Aruba pa continua cu su estudionan avansa, a confirma na NoticiaCla.com cu e tin su pensamento riba e tema aki, aunke breve. E no ta considera cu vota pa e ley actual ta algo positivo pasobra e ta duna Hulanda e poder pa haci cu Aruba manera cu e kier riba tereno financiero. Di otro banda, e no ta sinti cu e uno por bay sin e otro. Mientras cu mester vota contra e ley, mester tuma cierto medida si, pa sigura cu Aruba su situacion no ta bira pio. Mientras cu su conseho pues ta pa vota contra e ley, e ta insisti cu mester tuma tur medida cu a wordo acorda cu Hulanda, 'pa salvaguardia e autonomia, libertad di e pueblo arubano'. 

CONTINUA ESTUDIO

E ex mandatario ta subi avion e fin di siman aki, rumbo pa New York, unda cu e lo cuminsa cu su estudio pa ‘master’ den administracion publico na Columbia University, conoci pa tin studiantenan di mas edad cu tin experiencia caba di trabou y kier avansa un poco mas. Cu su 36 aña di edad, e ta wordo considera como un ‘mid-career’. Rumornan cu e lo a haya esaki como un ‘studie opdracht’ e la desmenti. “E no ta un studie opdracht. Tur ta fondo personal” Yrausquin a bisa di su estudio cu lo dura 16 luna y lo ta a base ‘full time’.

RETIRO COMO MINISTER

Yrausquin a retira mas cu un aña pasa como minister di finanzas,   y a bisa cu esaki ta ‘pasobra un dia prome, prome minister Eman a sera un acuerdo cu Hulanda, unda cu autoridadnan financiero a pasa pa Hulanda”. Algo cu Yrausquin claramente tabata contra. Y confirmando cu tabatin problemanan interno den e partido e tempo ey, no tabata posibel pa bolbe como un parlamentario. Algo cu den un situacion diferente, lo tabata un paso logico. E ex mandatario no a reacciona riba e ponencia cu su estudio avansa aworaki ta parti di un preparacion pa un futuro carera politico cu un eventual partido propio, of uni cu otro partido. NOTA. Foto ta di archivo di tempo cu Yrausquin tabata den un conferencia di prensa na 2014 como minister.