Na Corsou Parlamento ta pasa mocion pa gobierno pidi Hulanda sosten militar pa situacion Venezuela

WILLEMSTAD - Ayera Parlamentu den su totalidat a aseptá na final di deliberashon riba kapítulo 11(ministerio di Asuntunan General) ku promé minister Pisas, dos moshon. E moshonnan ta pa salbaguardiá seguridat aéreo, siudadanonan di Kòrsou, turistanan, nos ekonomia i nos soberania teritorial. Un dje moshonnan ta pa gobièrnu pidi sosten di Defensa militar na Kòrsou. E moshonnan a keda manda pa gobièrnu di Kòrsou, Eerste kamer der Staten-General, Tweede kamer, Staten di Aruba, Staten di St. Maarten, Konseho Insular di Bonaire, Sint Eustatius i Saba, Konseho di Minister di Reino, gobièrnu di Aruba, gobièrnu di Sint Maarten.

E promé moshon ta konstatá ku ta importante ku Reino Hulandes ta dal stap diplomátiko direkshon di Merka, pa pidi Merka pa den nan akshon kontra di Venezuela evitá di drenta den espasio aéreo di Kòrsou. Pues ehersé buelonan no outorisá den nos espasio aéreo.

P’esei ta hasi un apelashon urgente na gobièrnu di Kòrsou pa di inmediato inisiá kòmbersashon ku gobièrnu di Hulanda i otro paisnan di den Reino, ku e minister enkargá ku Asuntu di Eksterior di Reino, por pone stapnan diplomátiko de direkshon di Merka i dor di entregá un nota òf un protesta diplomátiko, kaminda ta pidi transparensia kompleto di e operashonnan militar den espasio aéreo di teritorio di Kòrsou. Tambe pa e operashonnan Merikano den nos espasio aéreo por komuniká esaki ku nos outoridatnan di tráfiko aéreo. I pa informá parlamentu di insidentenan kaminda militarnan ta envolví den espasio aéreo di Kòrsou.

E di dos moshon ta urgi gobièrnu di Kòrsou pa drenta den kòmbersashon ku minister di Defensa Hulandes, pa abase di artíkulo 36 di Statüt, hasi un petishon formal pa sosten militar. I den esaki pa eksplísitamente hasi petishon pa por pone na disposishon di Kòrsou kapasidat di defensa ku por kontribuí na seguridat di tráfiko aéreo riba Kòrsou. Esaki por enserá radar militar ku kapasidat di sensor pa detektá aparatonan ku ta funshoná sin un “transponder” aktivo den laira; sosten pa análisis di informashon i interkambio di tráfiko aéreo sospechoso; kapasidat di kontròl marítimo pa identifiká situashonnan; otro medionan di Defensa ku ta yuda den kuadro di sosten militar. Naturalmente gobièrnu tin di informá parlamentu di tur loke ta atendé ku Defensa. E moshon aki ku ta un proposishon di frakshon di MAN-PIN huntu ku otro frakshonnan di Oposishon i Koalishon, a keda aseptá unánimemente. Asina Kòrsou ta manda un mensahe fuerte den Reino. NOTA: Texto ta scirbi den papiamento fonetico di Corsou.