KLM ta sigui bula pa Corsou, apesar di raportahe di casi-accidentenan aereo

SCHIPHOL – E aeroliña hulandes KLM a anuncia dialuna cu nan ta sigui bula pa Corsou, despues cu na fin di siman pasa a bin raportahe di casi-accidentenan den e espacio aereo riba e isla. Sinembargo, e compania aerea Hulandes ta sigui e situacion hopi cerca y tin contacto cu e autoridatnan relevante, segun e compania a bisa den un declaracion. “E decision pa no bula pa un destino specifico of pa evita un cierto espacio aereo ta basa riba e analisis mas actual na e momento,” asina KLM ta declara. “Basando riba esaki, na e momento aki no tin ningun motibo pa evita e espacio aereo di Corsou.”

Diabierna pasa, un avion di pasahero di e compania aerea Mericano JetBlue mester a desvia den e espacio aereo riba e isla pa evita un avion militar di Merca. Dialuna, Noticiacla.com a raporta di un di dos caso di casi-colision riba Corsou, unda un avion civil comercial tambe tabata involucra. “Den e ehecucion di su operacionnan, KLM semper ta pone e seguridad di pasaheronan y empleadonan riba prome lugar,” e compania aerea a enfatisa. “Scohe rutanan sigur y optimo ta parti fiho di nos practica diario.”

KLM ta usa un sistema specifico pa “analisa riesgo y asina determina rutanan di vuelo sigur,” segun e compania a splica. “Pa e analisis aki, tambe ta wordo usa informacion cu ta wordo comparti den e grupo di experto Hulandes, unda tur companianan aerea Hulandes y autoridatnan relevante ta participa.”

Corsou ta keda hopi cerca di Venezuela, unda e Mericanonan ta ocupa cu un gran concentracion militar. E forza militar di Merca a laga sa na medio Mericano cu seguridad ta sigui ta prioridad numero unu y cu nan ta investigando e situacion.