Bus cu muchanan di scol ta cay for di un klif na Colombia, por lo menos 17 persona a muri

ANTIOQUIA - Den region Colombiano Antioquia, ayera mainta ora local, un bus cu muchanan di scol a cay for di un klif. Por lo menos dieseis alumno y e chaufer di e bus a perde nan bida. Otro binti persona a keda herida, di cual tres ta den condicion grave. E victimanan a wordo hiba pa hospital na e ciudad Medellin, segun gobernador Andres Julian Rendon. “Esaki ta noticia hopi tristo pa henter e ciudad, specialmente durante e dianan di fiesta. Cu Dios duna nan consuelo y paz,” Rendon a skibi. E bus tabata na caminda for di municipio costero Tolu pa Medellin. Den e bus tabata muchanan di scol secundario cu a bay beach pa celebra nan entrega di diploma.

CAY MAS O MENOS 60 METRO ABOU

Un alumno a logra sali for di e bus y busca ayudo, segun Rendon a conta medio localnan. Un otro alumno cu a sobrevivi e accidente a bisa cu na momento di e choque tur e alumnonan tabata drumi. E bus lo a cay mas o menos sesenta metro bou den un ravin. “Mi ta haya esaki terrible ora hende huben muri, specialmente ora nan ta na punto di cuminsa studia of biba un bida felis,” presidente Gustavo Petro a skibi riba X. El a mustra su condolencia cu e famianan. “Esaki ta mal noticia pa nos pais.” Te awor no ta cla con e accidente a pasa. Ministerio di Transporte a bisa cu ta duna apoyo den coordinacion di e serviciunan di yuda riba e lugar di e accidente.