Aruba ta conoce su di 8 victima di trafico pa 2015

ORANJESTAD – Aruba a conoce su di 8 morto dos dia pasa, ora cu victima di trafico Derek Cornelius Levestone (59) a fayece, a consecuencia di e heridanan cu e la ricibi di un accidente dos luna pasa. Vocero di polis Lito Laclé a confirma esaki pa NoticiaCla.com diahuebs atardi. Ta apenas awe tardi fiscal Zondervan a determina cu ta considere un morto di trafico. Como tal ta te awe tardi numa por a raporta e informacion como un ‘morto di trafico’.

E ACCIDENTE

E accidente mes a sosode dia 2 di juni ultimo ora cu Levestone a wordo alcansa pa un auto dilanti di YMCA. E la keda hospitalisa for di e dia ey, y dia 4 di augustus pa 8:32pm docter Seger a constata morto oficialmente. Ta awe tardi 4’or cu e fiscal Zondervan a indica na polis cu oficialmente ta considere e persona ainda como un victima di trafico, y asina ta bira oficialmente e di 8 victima di trafico pa 2015. NoticiaCla.com ta manda palabra di condolencia na famianan di e fayecido.