No mester tin ningun sorpresa e aña aki ora cu scolnan habri proximamente

ORANJESTAD – No tin ningun scol cu lo mester keda sera, of alumnonan re-aloca ora cu scol habri atrobe aki dos siman. E minister di enseñansa Michelle Hooyboer a sigura NoticiaCla.com cu contrario na otro añanan, lo no tin sorpresa. “Por lo menos, no cu ami sa. Tur scol ta habri normal e biaha aki” e mandatario a sigui bisa. Ultimo añanan, ora cu ta dia pa scol habri, diripiente tabata haya notificacion cu un of otro scol(nan) lo no por a habri pa varios motibo. Entre nan, cu e scol lo ‘tabata den renovacion ainda’ of cu a topa ‘un of otro situacion cu ta impedi e scol di habri riba e fecha normal’. Esey a desrumpi henter e scol y e mayornan, cu ya tabatin nan temporada planea.

TUR COS KEDANDO CLA

Pero e biaha aki, esey no mester ta e caso, segun e mandatario. Ora cu scol habri proximamente, tur cos mester ta ok y tur scol mester por habri segun nan schedule. Si tin scol cu ta wordo reconstrui, remodela etc, esey lo ta conoci caba pa tur hende, y e pasonan adecua lo a wordo tuma. Pues ey tampoco lo no tin ningun problema. Den cuadro di e bishitanan pa scol, e minister encarta a mira cu un trabao di construccion basta grandi tumando luga na Colegio San Nicolas. Aunke e contratista a haya su mes cu algun contratiempo, Director di Freman Construction, esta Angelo Arends a laga sa cu tur cos ta keda cla pa ora cu scol habri riba dia 17 di augustus.

UPGRADING

E compania di construccion a percura pa un upgrading total di e scol cu lo percura pa miho facilidadnan pa e alumnonan, e rectorado y e personal di administracion. E cambionan ta grandi, segun Arends, kende a splica cu e dos trabaonan cu mas impacto ta e construccion di un “klaslokaal” riba un di dos piso y e espacio nobo di oficina. E mesun contratista tambe ta bezig na Graf von Zinzendorfschool na San Nicolas, y e trabao aki ta wordo entrega pa dia 17 di augustus.

NA TEMPO

Arends a bisa cu tanten cu nan ta bezig cu e construccion y “verbouwing”, un grupo di alumno tambe ta bezig cu trabao di verf e parti paden di e lokaalnan bao guia di e scol mes, y pues ora cu alumnonan yega bek scol dia 17 nan lo keda contento cu e transformacion cu a tuma luga na nan scol.