Rotterdam a yama studiantenan Caribense bon bini

DEN HAAG – Den e Burgerzaal di stadhuis di Rotterdam a tuma lugar awe 6 di augustus un encuentro pa yama bon bini na e grupo di studiantenan for di e islanan Caribense cu a bin Rotterdam pa sigui studia. Presente den nomber di Gabinete di Aruba tabata directora Shandra John y funcionario di enseñansa di Gabinete di Aruba Ivonne Navas.

PROGRAMMA 

E presentacion tabata na encargo di Karin Fraai. E programma a cuminsa cu un video di e ciudad di Rotterdam. Despues secretaris di Gemeente Rotterdam André Verhooren a hiba palabra den nomber di e gobierno municipal. Den su discurso sr. Verhooren a bisa na e studiantenan kico nan por spera y encontra na e cuidad di Rotterdam. Tambe ela bisa cu sigur e studiantenan lo haya algun contratiempo, pero cu nan mester busca sosten cerca nan mentor of cerca docentenan na nan scol. Siguientemente Karin Fraai a papia cu algun di studiantenan nobo pa nan conta mas tocante di nan mes. Despues Karin a puntra directora di Gabinete di Aruba Shandra John ariba su experencia como studiante na Hulanda. Sra. John no unicamente a conta ariba su experencia como studiante na Erasmus Universiteit, pero tambe a duna consehonan util na e grupo di studiantenan nobo. Tambe a hiba palabra dos studiante kendenan recientemente a termina nan estudio pa asina conta tocante nan experencia. Un di nan ta e Arubiano Jai’rus Barry, cu despues di su estudio “maatschappelijk werk en dienstverlening” na Hogeschool Inholland na Rotterdam, awor ta traha na e “jongeren loket” di gemeente Rotterdam. E parti final di e programa a consisti di un quiz tocante Rotterdam pa asina test e conocemento di Rotterdam bou di e studiantenan.