Rianne Letschert (D66) ta e informador nobo pa dirigi formacion di D66, CDA y VVD

DEN HAAG - Rianne Letschert, president di directiva di Universiteit Maastricht, lo bira e nobo informador na nomber di D66. E tin como tarea pa dirigi e proximo ronda di combersacionnan entre Jetten (D66), Bontenbal (CDA) y Yesilgoz (VVD). Letschert ta tambe presidente di Nationaal Groei Fonds. Mañan tin un debate den Tweede Kamer tocante e reporte final di informador Buma (CDA). E la conclui cu aworaki no tin posibilidad pa un gabinete di mayoria. VVD ta blok GroenLinks-PvdA y D66 no kier un coalicion cu JA21. D66 lo propone formalmente na Kamer e proximo fase den formacion. Ta spera cu un mayoria den Kamer lo ta di acuerdo, aunke PVV y GroenLinks-PvdA probablemente lo vota contra. Despues di esey, e  informador nobo por cuminza traha y VVD lo sinta tambe den e combersacionnan di contenido. E documento conjunto – e “agenda positivo” di Bontenbal y Jetten – lo wordo revisa atrobe pa mira con por sigui pa lanta un gobierno.