AVB a sobrevivi mocion di desconfiansa durante reunion

ORANJESTAD – Arubaanse Voetbal Bond (AVB) a sobrevivi un mocion di desconfiansa ayera nochi, durante nan reunion general. De hecho, e mocion di desconfiansa a wordo bari for di mesa dado momento. Di 34 organisacion di futbol registra, un total di 21 a presenta, pero na final ta apenas 12 a sigui ora cu 9 a retira como protesta. Na final e directiva actual di AVB mes a keda, unda cu 2 miembro a keda re-eligi y 2 miembro nobo a wordo eligi.

MOCION DI DESCONFIANSA

Na inicio di e reunion e 9 bondnan a pidi pa cambia secuencia di e agenda, y pone e punto di mocion di desconfiansa mas dilanti. Esey a keda rechasa, pa cual e bondnan menciona a dicidi di bandona sala como protesta. E reunion a continua asina mes. Na momento cu a presenta e punto di mocion di desconfiansa (agenda punt # 6), esaki a keda rechasa debi cu no tabatin suficiente bond pa sostene esaki. E poconan cu a keda atras, no a sostene e mocion tampoco.

FIFA

Interesante ta cu durante e reunion, tabatin presencia di consehero legal di Concacaf y FIFA, cu a splica esnan presente di e situacion cu a surgi y su implicacion pa cu futbol di Aruba e internacional. Pues, na final, e directiva actual (cu excepcion di e nobonan) mes a keda.