Banco Central a mantene e reserva obligatorio pa banconan comercial na 12,5%

ORANJESTAD - Banco Central di Aruba (CBA) a dicidi durante e reunion di MPC di 10 di october 2025 pa mantene e tasa di reserva obligatorio pa banconan comercial na 12,5% entrante 1 di november 2025. E decision aki riba e maneho monetario ta mantene e balansanan minimo cu banconan comercial local mester tene na CBA na e mesun nivel.

Puntonan principal:

1.        Reservanan adecua apesar di crecemento den credito

Te cu augustus 2025, reservanan a surpasa substancialmente e normanan cu CBA ta mantene, apesar di un aumento den credito. Ademas CBA ta anticipa cu e reservanan di divisa lo keda suficientemente adecua y lo sigui crece.

2.        Un inflacion abou

Na augustus 2025, e inflacion midi na final di luna contra e mesun luna di e aña anterior a permanece na un nivel relativamente abou di -0,8%. Riba un promedio anual e inflacion a alcansa 0,4%. 

3.        Incertidumbre mundial economico

E incertidumbre mundial na e momentonan aki por impacta e reservanan di divisa y inflacion, cu por causa desviacionnan for di e proyeccionnan actual cu ta fungi como e punto di salida (“baseline”).

4.        Desaroyonan domestico 

Refinanciamento local di debenan externo di gobierno por tin un impacto riba e reservanan di divisa. 

CBA ta monitor indicadornan monetario y economico di cerca y lo ahusta su posicion di maneho monetario ora ta necesario pa mantene e tasa fiho di e florin na e dollar Mericano. 

Pa mas informacion por manda un email na: communications@cbaruba.org.