SMOA: Veredicto no ta contribui na situacion di enseñansa di Aruba

ORANJESTAD - E veredicto (dicta siman pasa contra SMOA) totalmente no ta contribui na e situacion di enseñansa riba e isla. Asina Stichting Middelbaar Onderwijs Aruba (SMOA) ta duna como nan prome reaccion pa medio di un comunicado. Den e comunicado, SMOA ta recorda cu dialuna pasa huez a dicta sentencia den e huicio sumario (kortgeding) cu SMOA/Colegio Arubano (CA) a entama contra e decreto ministerial den cual e minister ta stipula e normanan encuanto e acceso di alumnonan di mavo den havo 4. E huez a stipula cu SMOA a demostra insuficiente motibonan urgente pa pospone e implementacion di e normanan.

CAMBIA NORMANAN CUANTITATIVAMENTE

Los di e hecho cu SMOA a duna nan opinion cu no ta prudente pa cambia e normanan cuantitativamente mediante un decreto ministerial, SMOA/CA ta di opinion cu e veredicto aki totalmente no ta contribui na e situacion di enseñansa riba e isla. Colegio Arubano a constata e ultimo añanan cu e alumnonan di mavo por logra haya un diploma di havo reconoci pa Hulanda solamente si nan enseñansa anterior tabata riba un bon nivel. Hecho ta cu e nivelnan di e alumnonan di mavo na Colegio ta diferencia hopi y mayoria ta insuficiente. Un indicador segun SMOA, ta por ehempel cu si e schoolonderzoek(SE) ta mucho mas miho traha cu e examen final (eindexamen), e cifra final (eindcijfer) ,de facto, ta mas halto fictivamente. Tambe e comision cu a investiga e conexion mavo-havo4, ta di opinion cu e esnan di mavo cu ta drenta havo 4 lo tin chens pa gradua solamente si riba tereno di e enseñansa na e mavonan ta haci cambionan necesario pa cu e calidad. SMOA/CA no por conclui nada otro cu riba e tereno aki, nada a sosode.

RESULTADO POSITIVO

Ta pa e motibonan aki SMOA/CA no ta spera ningun resultado positivo di e decreto ministerial aki. Al contrario, hustamente dor di mantene e norma abou, no ta yuda e alumnonan di mavo mas suak. E chens pa fracasa na havo y e frustracion ora cu e resultadonan ta decepcionante, lo bira mas grandi so. Hustamente e hecho cu dor cu e ultimo añanan no a sosode nada pa cu e calidad di enseñansa na mavo, combina cu e exigencianan mas pisa rond di e diploma di havo, ta mustra cu e angustia cu e cantidad di drop out bou di e alumnonan di mavo den havo ta subi, ta hustificabel

GOBIERNO TA PRONKIA

Gobierno por a pronkia mas si el a empeña riba un strategia unda e ta traha mas riba coreccion cualitativo na e mavonan y tambe coreccion di e formanan di enseñansa cu ta cuadra cu e capacidad di e alumnonan; por ehempel den e forma di bon enseñansa riba nivel mbo. Manera a afirma mas biaha, hunto CA kier traha sigur na un bon preparacion di e alumnonan di mavo pa un conexion mas flexibel y asina saca lo maximo di nan capacidadnan.

ADMITI MAS ALUMNO POSIBEL

Den e simannan benidero CA lo admiti mas tanto alumnonan di mavo posibel, conforme e sentencia di huez. CA ta haya su mes urgi pa keda mantene su mes na su nivel halto y e curiculo pa no trece e exigencianan cu ta mara na un diploma di havo, den presion. CA ta lamenta cu hustamente pa motibo di e decreto ministerial aki, no ta crea oportunidadnan real pa esnan cu e kier a yuda. Ta algun di e alumnonan di e grupo meta so ta haya oportunidad, si nan enseñansa na mavo tabata riba un nivel cualitativo