Deadline pa trata AFT prome cu 4 september hopi ‘tight’

ORANJESTAD – E schedule (pa por keda cla cu e ley di Aruba Financieel Toezicht (LV AFT)) ta hopi tight. Asina vice presidente di parlamento Chris Dammers a confirma na NoticiaCla.com ayera. Dammers ta referi na e hecho cu tin chens cu no ta keda cla cu tratamento di e ley, prome cu 4 di september proximo. Esey por bira un problema si tene na cuenta cu Hulanda a confirma na NoticiaCla.com, cu pa e fecha ey nan lo dicidi kico ta haci cu Aruba y si Aruba a cumpli. Y segun protocol di 2 di mei, incumplimento di Aruba pa cu e ley aki, tin consecuencia pa Aruba.

NO TIN SIGURANSA

Dammers a bisa NoticiaCla.com cu no tin siguransa cu lo keda cla, “ mirando cu nos no a haye (e ley) ainda”. Dado caso nan haye awor, tin cu traha basta duro pa por keda cla. “Si presion bin, semper bo por squeeze algo” Dammers ta bisa, siendo un poco optimista. Pero den mesun rosea, e ta realistico. “Problema ta cu nos no tin e strekking di e ley y su cambionan”. Pues segun e vice presidente, esey tambe ta bira un problema.