Presidente Maduro: Aresto di Hugo Carvajal ta illegal

CARACAS - "Nos tabata testigo di un emboscada contra un funcionario di nos patria, protegi pa convenio di viena”. Un presidente venezolano furioso a habri diahuebs contra e hecho cu un di su personanan mas serca di dje, a cay sera na Aruba. “E la haya su mes secuestra ilegalmente violando e convenio di Vienna” Nicolas Maduro a bisa. Y tur esaki, segun Maduro, siendo den un funcion diplomatico.

E presidente a considera e aresto como uno ‘illegal y arbitrario’. “Nos no ta bay permiti cu ni e pais, ni ningun venezolano wordo trapa asina” Maduro a sigui bisa. “Ta tarea di nos tur, pa respeta nos patria” e presidente a sigui bisa, y mi ta para pa e general Carvajal Barrios”. Maduro a bisa esaki durante e actonan di 24 di juli na estado Zulia. E mandatario anteriormente a haci un yamada urgente (manera cu NoticiaCla a raporta anteriormente) na gobierno di Reino Hulandes pa nan rectifica e acto aki, riba e hechonan cu ta viola e derecho internacional. Tambe a pidi e liberacion inmediato di e funcionario diplomatico Hugo Carvajal. Si esaki no tuma lugar, e por deteriora e relacionnan diplomatico, economico, energetico y comercial sosteni actualmente.

Carvajal ta deteni for di diaranson anochi den un cel na warda di Santa Cruz, y ta scucha diabierna merdia si su detencion ta wordo prolonga cu 8 dia. Te cu diahuebs anochi, e peticion di extradicion no a drenta serca Ministerio Publico.