Presidente di Parlamento di Aruba ta na Bruselas pa Eurolat

BRUSELAS – Dialuna 1 di desember 2025 a duna inicio na e reunionnan parlamentario entre Parlamento Europeo y Parlamentonan di Latino America y Caribe (Eurolat) na Bruselas. Den esaki, president di Parlamento di Aruba, Marlon Sneek tambe ta participa, hunto cu su coleganan di Corsou y St Maarten. Despues di un session preparatorio di e grupo Latino Americano y Caribe a sigui e session inaugural, den cual a pone enfasi riba e balor di e relacion entre e parlamentonan di ambos region.

Motibonan historico, economico y financiero ta entre e punto cu a wordo menciona. Pero mas ainda den e tempo di transformacion mundial aki cu nos ta bibando, ta esencial pa enfatisa cu e region di Caribe ta un zona di paz. E trabou di parlamentarionan awendia ta bai mas leu cu e fronteranan di nan pais; legislacion ta afecta mas y mas otro paisnan den e forma interdependiente cu e mundo ta funciona. Den cuestion economico, Latino America y Caribe ta keda un area di mercado interesante pa inversion Europeo, cu cual e Parlamento Europeo ta tene debido cuido.

Di parti di Caribe tabatin participacion di representantenan di parlamentonan di Aruba, Cuba, Corsou, Republica Dominicana y Sint Maarten. Nan ta forma parti di Parlatino. Tambe tabatin participacion di gruponan parlamentario di Parlacen (Sentro America), Parlasur (Sur America) y Parlandino.

E conferencia parlamentario a sigui dia 2 y 3 di desember cu varios reunionnan di comision y foro.