Huez: Pareha mericano ta haya derecho pa keda cu cacho crioyo

ATTLEBORO — E cacho crioyo Coco, -e mesun cacho cu tabata e centro di un debate legal internacional-, lo keda Merca. Corte ayera a dicta na fabor di e famia mericano, y a bisa cu e cacho por keda Merca y cu e famia O’Connell ta haya e custodia di e cacho. E doñonan arubiano tin 30-dia pa apela e sentencia aki.

DEMANDA

Lisa-Marie O’Connell, cu a wordo demanda pa dos ciudadano di Aruba cu ta argumenta cu nan ta doño di e cacho, ayera a bira doño legal di e cacho, segun huez Edmund Mathers. “Mi ta hopi contento. E cos mas facil tabata pa duna e cacho bek. Pero mi a haci e cos corecto” O’Connell a bisa. “Mi a gana. Mi ta sinti cu mi tin un debe infinito cu e huez. E la duna e veredicto corecto”.

E CASO

O’Connell cu su casa a dicidi di tuma e cacho na Aruba durante nan vacacion aña pasa. Nan a haya e cacho den mal estado, yena di carpata y sushi. A haci e tramite legal, segun nan, pa transporta e cacho pa Merca. Sinembargo e doñonan di e cacho na Aruba a presenta y demanda cu nan kier e cacho bek. E famia mericano a nenga, pa cual e famia arubiano a hiba nan corte mericano. Y ayera e huez a dicta na fabor di e pareha mericano. E ta prome biaha cu un caso asina ta bin dilanti, ora cu un huez mericano tin cu determina e destino di un cacho arubiano, te na Merca.

E SENTENCIA

Den un sentencia di 5 pagina, Mathers a bisa cu e famia na Aruba no a establece corectamente cu nan ta e doño di e cacho. Ademas e documento pa prueba esey, y cu nan a presenta, segun hues no tabata valido. Tambe e huez a haya cu partinan di nan (e famia arubiano) no tabata consistente of tabata carece di credibilidad. P.e. hues a haya cu ta inconsistente cu nan lo a traha un acuerdo di propiedad, pero mes momento tabata hopi dehado pa a laga e cacho core liber riba un base regular, sin un banchi, un id, of a implanta un chip computerisa pa identificacion. Ademas e la dicta cu si e nan tabata doño legal mes, nan a faya di provee e necesidad basico di e cacho, conduciendo cu e cacho a bira un ‘cacho riba caya’. E huez a nota cu Tromp (un di e doñonan di Aruba), a haci poco intento of nada mes di intento pa localisa e cacho. “E tratamento cu e cacho tabata haya na e momento ey, tabata ‘con cu ta”. E abogado di e famia di Aruba, a indica cu no a lesa e sentencia ainda y como tal no por a duna un comentario. Manera indica, e famia di Aruba tin 30 dia pa apela e sentencia.