OM: Venezolano ‘indocumenta’ a fayece a consecuencia di ‘verstikking”

ORANJESTAD - E motibo oficial di morto di e venezolano ‘illegal’, Jose Gregorio Javier Bullones, ta ‘asfixia’, osea verstikking. Asina vocero di ministerio publico Ann Angela a confirma na NoticiaCla.com awe tardi laat, publicando asina e prome resultado di e autopsia haci. E hecho cu e persona a guli papel di wc y pak y sera su slokdarm, a pone cu e persona a stik y muri finalmente, Angela a bisa. Mientras cu e resultado por wordo interpreta cu e persona a comete suicidio, OM no kier bay den e direccion ey ainda.  

INTERPRETACION OM

Segun Angela, e focus di awe tabata pa sa e causa di e morto. “Esey ta conoci pa awor. E autopsia ta forma parti di e investigacion, cu a start di momento cu a encontre morto” Angela a bisa. “Pa awor, nos por duna esun resultado ey.. pero Investigacion den su totalidad ta andando ainda y nos tin cu warda e wordo afgerond” Angela a bisa.

INVESTIGACION

Manera ya ta conoci, landsrecherche a cuminsa un investigacion pa haya sa e circumstancia di e morto di e persona haya morto den un cel na Huis van Bewaring na Dakota.  E persona mientrastanto a keda identifica un dia despues como Jose Gregorio Javier Bullones,(25) naci na Venezuela. Mientras cu e la keda deteni pasobra e lo ta un ‘illegal’, oficialmente rapport di polis (publica awe) ta bisa cu e persona a bin Aruba dia 2 di augustus, ‘di vacacion’. Pues e motibo di su detencion relaciona cu ilegalidad tambe ta den investigacion. E caso ta uno peculiar debi cu e persona a drenta Aruba legal, pero despues a bira 'illegal' pasobra no por a demonstra documentonan di estadia etc. Como tal e la wordo hiba HVB pa por a warda su deportacion bek pa su pais. 

MELDING

Manera ta conoci, dialuna polis a haya notificacion di personal di warda nos costa, cu na HvB lo tin ‘un sospechoso lo a muri den un cel’. Na yegada polis enberdad a tuma nota cu e persona no tabata duna señal di bida mas. Mesora a avisa ambulance y demas autoridad manera recherche, BFTO, Officier van Justitie. Docter Lin ta esun cu merdia a oficialmente constata su morto. Nota: Foto di Huis van Bewaring na Dakota, unda cu a haya e venezolano.