CBA: Mas turista di Venezuela y menos di Colombia pa Aruba

ORANJESTAD – Den e rapport mensual di Banco Central di Aruba pa luna di mei, ta raporta un aumento drastico di turista for di Venezuela. Ta papia di un expansion di 6.730 turista cu a bishita nos isla na luna di mei. Na Mei 2015, e cantidad di turista a registra 87.691 bishitante, cual ta 12,3 porciento mas cu na Mei 2014. E expansion di 34,0 porciento den e mercado Latino Americano tabata principalmente responsable pa e crecemento aki. Tambe, e mercado Norte Americano a subi cu 4,9 porciento. E subida den e mercado Latino Americano ta primordialmente e resultado di un expansion di 6.730 bishitante for di Venezuela.

MENOS FOR DI COLOMBIA

Un caida den bishitante for di Colombia, Brazil y Argentina a mitiga parcialmente e subida aki. E aumento den e Mercado Norte Americano ta e resultado di un subida di 2.555 bishitante for di Merca, mientras bishitante for di Canada a baha cu 65. Den e luna en cuestion, e cantidad di anochi destina pa pasa na Aruba a crece cu 13,1 porciento, compara cu e mesun luna di e aña anterior. E averahe di anochi destina pa keda na Aruba a subi levemente di 6,8 anochi na Mei 2014 pa 6,9 anochi na Mei 2015. E cantidad di turista crucero a baha cu 24,0 porciento te na 26.447 na Mei 2015, compara cu Mei 2014. E cantidad di barconan crucero tabata 13 na Mei 2015, y a keda mescos compara cu e mesun luna di e aña anterior.