Airbus ta bolbe yama miles di avion tipo A320 bek. Den hopi pais biahenan a ser cancela

WASHINGTON- Fabricante di aeroplano Airbus a anuncia diabierna un accion grandi pa bolbe yama su avionan A320. Rond seis mil aeroplano mester un update di software. Motibo ta un incidente recien cu un avion cu a perde altura grandi di un biaha pa otro.

Varios aerolinea a cancela of atrasa biahenan diabierna anochi debi na e problema di software. Air France, segun e corant frances Le Parisien, a cancela mas cu trinta biahe. E aerolinea japones ANA a bisa cu nan a cancela 65 biahe. Tambe den paisnan manera Australia y Nieuw-Zeeland biahenan a cai, cu cola largu den aeropuerto di Melbourne y Auckland.

Riba 30 di oktober, un A320 di Jetblue di Merca a drenta den problema. E avion tabata na caminda for di Newark pa Cancun den Mexico. Tabatin un fayo den computer durante cu e avion a perde altura y e piloto no por a tuma control. E avion a wordo desvia pa aeropuerto di Tampa den Florida y a haci un aterisahe di emergencia. Ningun hende no a ricibi daño serio. Medio di Merca a bisa cu tabatin un “duikvlucht di 5000 meter den 6 minuto”.

Segun Airbus, despues di investigacion a keda cla cu radiacion fuerte di solo por afecta dato crucial pa control di aeronanf. Airbus ta bolbe yama rond seis mil aeroplano, cu ta mas cu mitar di e flot mundial di A320.

KLM

E efecto pa Hulanda ta chikito. KLM ta bisa cu e situacion no tin impacto riba nan avionan A321, pasobra e modelo ey ta usa otro software cu no tin e problema aki. “No tin niun impacto riba seguridad of operacion di e flota di KLM tipo A321”, segun e empresa.

SOLUCION RAPIDO?

Segun Bloomberg, e update di software por tuma poco tempo pa mayoria di avionan. Solamente rond mil avion mas bieu lo mester un upgrade di hardware cu ta mas dificil y ta tuma hopi tempo. Airbus mes no kier duna comentario riba esaki.