Aruba ta reduci tarifa cu ta cobra aerolineanan cu bin nos isla

ORANJESTAD – Entrante 1 di januari 2016, Aruba lo reduci e tarifa cu ta cobra aerolineanan pa uza e servicio di Aruba su aeropuerto. Esaki a keda confirma pa minister di transporte Otmar Oduber awe mainta na NoticiaCla.com. Esaki ta a base di e entradanan cu e departamento nobo Air Navigation Services Aruba NV (ANSA) a ricibi caba, y cu ta mas halto cu a premira. “Como tal a dicidi di reduci esaki. A anuncia esaki caba na e aerolineanan y asociacion internacional di aerolinea, International Air Transport Association (IATA).

RELACION IATA Y CORSOU

E rais di e storia ta basa riba kehonan cu e mesun AITA tin riba maneho di aerolineanan na Corsou. Lo tin keho cu e falta di comunicacion y relacion cu IATA tin cu Corsou, ta pone cu ta practicamente ‘core cu turistanan for di Corsou’. Den un articulo den e matutino Antiliaans Dagblad’ e siman aki, nan ta relata riba e situacion aki cu a surgi. Entre e problemanan cu tin, pasaheronan ta wordo ‘cori’ debi na e tarifanan halto cu ta cobrando e aerolineanan y pasahero consecuentemente. “E impuesto pisa y e aumento cu varios pais den region ta cobra e pasahero, ta pone cu Corsou ta bira un destinacion hopi caro y hopi dificil pa haci negoshi cu aerolineanan. Asina Lionel van der Walt, Caribbean Area Manager di IATA a bisa recientemente. Tarifanan halto di Curacao Airport Partners (CAP), instancia cu ta maneha e aeropuerto di Corsou, ta preocupante. Mientras cu otro islanan si ta aplicando un forma di cooperacion cu ta yuda nan causa, Corsou no ta haciendo esaki. Di otro banda, ta admiti cu e gobierno di Corsou a cuminsa pa desaroya un modelo di costo pa aeropuerto, cu lo wordo usa pa regula e tarifanan actual. “Mientras cu e sector di aviacion no ta resisti e idea aki, IATA ta presiona si pa envolvi e aerolineanan den e proceso aki.

SITUACION DI ARUBA

Den caso di Aruba, contrario cu Corsou, minister di turismo a sigura NoticiaCla.com Aruba ta traha hopi di serca cu tur aerolinea. Sigur den e lantamento di ANSA, y hunto cu IATA a introduci tarifanan pa aerolinea. Hunto ta yuda cu monitoreo di e situacion y como tal tin un bon relacion tambe cu IATA.