Na Portugal: Yiu di Corsou a keda condena pa mal comportacion riba avion

WILLEMSTAD – Recientemente, durante tratamentonan di casonan di aviacion den Corte na Haarlem, Hulanda, Ministerio Publico a pidi pa declaracion di acusacion contra un homber Yiu di Corsou (YdK) no admisible. Esaki pa motibo cu e la keda condena caba na Portugal pa e mesun acusacion. Na Hulanda no ta posibel condena un hende dos biahe pa mesun acusacion.

Na Hulanda a acusa e homber originalmente pa mal comportacion, y den mesun cas e compania di aviacion y e personanan perhudica a pidi daño y perhuicio.

Riba 14 di februari 2024, riba un buelo di TUI di Hulanda pa Corsou, e piloto tabata forsa pa hasi un aterrisahe urgente na Lajes, Azores, pasobra un homber tabata comporta su mes den un manera cu no por a keda mas riba avion. Na e sitio ey nan a baha e YdK den mal ordo y a detene e pa despues condene.

E dia mes, e YdK a dicidi di cuminza zundra e tripulacion, insultando tur hulandes na bordo y tambe a pasa man riba atras di stewardessnan. Door di esaki, e YdK a causa terror riba e buelo.

Pasaheronan cu tabata riba avion a bisa cu na Schiphol por a nota cu e homber tabata actua straño, papia duro y parse bou di influencia di algo. Ora cu tur hende a aborda y cu e buelo a lanta 9 or di mainta ora hulandes, e la sigui papia duro cu otro hendenan.

Pero cosnan a cambia hopi lihé ora el a falta respet  y pasa man riba atras di un stewardess, cu a hala su atencion.

Un rato despues, e YdK a lanta y a cuminza zundra fuerte, insultando e ayudantenan. E la grita  u e  ta miembro di gang NLS (No Limit Soldier), cu su fam ta Z., y cu e  ta capaz di tur cos.

E  la bai parti dilanti pa insulta tur hende den avion, y especialmente e la pone su cara na cara di pasaheronan hulandes, ‘koba’ nan, y declara cu e  tin rabia riba hulandesnan “cu tin Yiunan di Corsou oprimi.” E situacion a crea tension grandi riba avion.