Problema entre gang di Bloods y Crips ta continua

SAN NICOLAS – E problema di gang na Aruba e siman aki atrobe a lanta cabez. Despues cu tabatin caso di tiroteo estilo ‘drive by shooting’ na un club nocturno, dialuna tabatin otro caso di problema di gang. E biaha aki na San Nicolas ora cu un miembro di e gang di Bloods lo a wordo ‘terorisa’ pa un miembro di e gang Crips. Algo cu tin e mayornan di hoben di apenas 15 aña man na cabez.

MELDING

Tabata casi mey anochi dialuna cu polis a wordo manda pa un caso di destruccion na St Antonieberg na San Nicolas. Polis a topa cu un señora cu a declara cu su nieto tabata mira television den sala, ora cu un baranca a wordo tira door di bentana y cay paden. Ora cu e hoben a wak pafo, e la bisa di a wak dos hoben na careda y a describi e hobennan. Segun e hoben, e dos otro hobennan lo ta parti di e gang di Crips y tambe cu nan lo ta studiante na EPB, pero no tabata sigur.

MUCHA FOI CONTROL

Despues mama di e hoben mes a bin serca e polisnan y a splica cu su yiu di 15 aña ta miembro enberdad di e gang di Bloods, y cu e ta sospecha cu ta trata di un problema di e dos gangnan aki. E la bisa di ta purba papia cu su yiu, pero cu e no ta scucha y cu e ta harta di e situacion. A wordo bisa tambe cu e no tin respet pa su mayornan. Polis a papia cu e famia y a referi e mana na departamento di asuntonan social, y despues a bandona e cas.

CASO DRIVE BY SHOOTING

Den fin di siman, tabatin e caso di drive by shooting unda cu segun polis, miembronan di e banda Crips lo a los tiro aunke no ta conoci contra ken nan a haci esaki.

BLOODS Y CRIPS

E gangnan di Aruba Bloods y Crips, ta deriva nan nomber di e gangnan di mesun nomber na Merca, primordialmente na California. Bloods gang na Los Angeles a wordo lanta na 1972 y awe tin un miembrecia di por lo menso 15 pa 20 mil miembro. Crips su origen tambe ta di Los Angeles, pero ta un poco mas biew cu esun di Bloods, esta di 1969. E cantidad di miembro ey tambe ta mas grandi cu entre 30 pa 35 mil miembro. Mayoria di nan ta hendenan color scur, y ta primordialmente ocupa nan mes cu traficacion di droga, atraco , asesinato, robo, y prostitucion.