Yakarta awor ta e ciudad mas grandi di mundo, Tokio a cay na di tres luga

YAKARTA - Yakarta a pasa Tokio como e ciudad mas grandi di mundo. Den capital di Indonesia ta biba 42 miyon persona, segun un cuenta nobo di Organisacion di Nacionnan Uni. Den Tokio tin 33 miyon. Dhaka tambe a pasa Tokio riba e lista. Capital di Bangladesh tin 37 miyon habitante. Segun e prediccion di Nacionnan Uni, Dhaka lo pasa Yakarta na mitar di e siglo aki. Por causa di envecihimiento y mengua di poblacion, Tokio lo cay te na di shete luga. Nan ta spera cu mas o menos 31 miyon lo keda biba ey. E cambionan no ta solamente producto di un diferente ritmo di crecimiento di poblacion. E pesquisadornan a usa un otro metodo pa conta, pa asina por compara informacion di paisnan diferente di un manera mas cla. E ultimo cuenta tabata den 2018.