Ultimo grupo di studiante di Aruba a yega Hulanda awe mainta

DEN HAAG – Awe diaranson 5 di augustus a yega e di tres y ultimo grupo di studiante Hulanda. Tur e 85 studiantenan a yega bon cu vuelo 765 di KLM. E grupo di awe tabata consisti di studiantenan pa Amsterdam, Rotterdam, Eindhoven, Breda y Tilburg.

DELEGACION

Na Schiphol un delegacion consistiendo di minister plenipotenciario di Aruba Alfonso Boekhoudt, directora di Gabinete di Aruba Shandra John, funcionarionan di departamento di enseñansa di Gabinete di Aruba, studiementor y miembronan di e POC (Plaatselijke Opvangcommissie) a ricibi e studiantenan. Minister Boekhoudt a encontra e studiantenan na e gate y a acompaña nan te cu nan a busca nan maleta. Asina ela tene un intercambio personal cu e studiantenan.

VIDEO

E aña aki a scohe pa yama e studiantenan bon bini na Hulanda na un otro manera. No pa medio di un discurso na aeropuerto, pero den un video den e bus Boekhoudt a yama e studiantenan bon bini. Entre otro e mandatario a bisa cu nan a bin studia na un pais cu otro custumber y idioma. Tambe ela menciona e retonan, sigur den e prome aña. Tambe e video ta contene un parti na unda John ta duna e studiantenan algun tips, manera pa nan ta cauteloso pa firma contractnan di companianan cu ta acerca nan ariba caya of via email. Alaves John a bisa cu e studiantenan e aña aki a ricibi un suma grandi for di Aruba pa cubri nan gastonan pa un periodo largo y cu nan mester bai bon om cu nan budget.

PROME AÑA

E prome aña e studiante ta ricibi guia di e studiementor, pero pa e resto di su estudio e ta cai bou di Gabinete di Aruba. Funcionario di departamento di Enseñansa di Gabinete di Aruba Ivonne Navas den e video ta bisa e studiante pa like Facebook di Onderwijszaken unda nan por keda na altura di loke ta pasando. Tambe via di Facebook nan por haci un pregunta of duna nan comentarionan. Tambe un peticion na e studiantenan pa bishita e website arubastudent.com pa informacion relevante tocante di nan aseguro.

EXITO DI ESTUDIO

Na final di e video Minister Boekhoudt ta bisa cu e ta spera cu e informacion brinda lo contribui na exito di e estudio y cu e diploma na final ta un sentido di orguyo pa nan mes, nan famia, pero tambe pa Aruba.

PROGRAMA OBLIGATORIO

Mayan nan lo participa na un programa di “opvang” obligatorio den nan ciudad di estudio y cu lo dura tres dia.