Ex presidente brasilero Bolsonaro den prizon pa cumpli e castigo di 27 aña

BRASILIA -Ex presidente di Brasil Jair Bolsonaro a cuminza cumpli su pena di prizon pa dirigi un intento di golpe di estado. E la ricibi 27 aña di prizon pasobra e la intenta haci un golpe despues cu e la perde e eleccionnan presidencial den 2022. E ta cumpli su castigo den oficina federal di policia den Brasilia. Dialuna e la wordo hiba p'ey despues cu e a intenta kibra su banchi electronico. Segun e corte di mas halto, e tabata plania pa huy. Bolsonaro mes a bisa cu e a haci esaki pasobra e tabata mira cos cu no ta existi, osea cu e tabata halucina.  Bolsonaro (70) a wordo condena den september door e corte halto, y tabata permiti pa spera apelacion bou arresto den cas. Siman pasa, e sentencia den apelacion a confirma. Peticion di su abogado pa laga e cumpli su castigo bou arresto den cas pasobra su salu ta malo, a wordo rechaza ayera. Tur opcion huridico a caba awor.

ORGANISACION CRIMINAL

Corte halto a dicidi cu Bolsonaro mester cumpli su pena den cuartel di policia, enbes di den prizon normal. E no lo tin contacto cu e   presonan cu tin ey. Segun polis, su cel di 12 meter cuadra tin su propio baño, airco, cama, tv y un mesa. Bolsonaro no solamente a wordo condena pa e intento di golpe, pero tambe pa dirigi un organisacion criminal arma.

POPULAR

Bolsonaro, apesar di su condena, ainda ta popular entre un parti di pueblo. Ex presidente ta un aliado di presidente Mericano Trump, cu a yama e proceso contra Bolsonaro un caceria di bruhanan. E caso tabata un di e motibonan pa Merka subi e tarifa di importacion di Brasil te na 50%. Entre tanto, e relacionnan entre e dos pais a mehora despues di un reunion entre presidente Lula y Trump na cumbre Asean, y mayoria di tarifa a wordo baha atrobe.