Hulanda ta baha nivel di intercambio di informacion cu Merca despues di atake

WASHINGTON D.C. – Hulanda a uni cu Reino Uni y Colombia pa limita cooperacion di inteligencia cu Merca despues di un serie di atake cu misil contra boto sospechoso di contrabando di droga den Caribe. E paso aki ta un di e consecuencia diplomatico mas grandi te awor, relaciona cu operacion Mericano cerca di isla ABC (Aruba, Boneiro y Corsou). E informacion aki a sali den un carta manda pa congresistanan Mericano Jim Himes y Joaquin Castro na Director di Inteligencia Nacional Tulsi Gabbard. E carta ta prome reconocimiento formal for di Camara di Representante cu tres aliado cercano – incluyendo un miembro di Reino – a baha intercambio di inteligencia. Segun e dos legislador, tanto agencia civil como militar di inteligencia Hulandes a bisa publico cu nan “a para den cierto ocasion di comparti informacion” cu Merca pa preocupa tocante legalidad y violacion di derecho humano den e airstrike. E paso for di Den Haag ta aumenta preocupacion den comunidad di seguridad transatlantico. Himes y Castro ta bisa cu tin temor pa violacion di derecho humano y politisacion di inteligencia – dos linea cora den cooperacion europeo-mericano.

Hulanda no ta su so. Reino Uni, miembro principal di alianza di inteligencia Five Eyes, tambe a baha cooperacion. Mientras cu Colombia, un socio regional antiguo, a suspende tur contacto cu agencia Mericano mientras e “boat strikes” ta sigui. Oficial Colombiano a yama e atake ilegal. E retironan coordina aki ta representa un problema sin precedente den red di inteligencia mas crucial pa Merca. Himes y Castro ta adverti cu falta di confianza “ta pone seguridad nacional di Merca den riesgo,” indicando cu alianza mundial di inteligencia ta un “multiplicador di fuerza” cu Merca no por perde.

Nan a pidi un informe inmediato for di Gabbard tocante:

Magnitud di daño den alianza di inteligencia

Impacto cooperativo riba seguridad di Merca

Paso cu gobierno ta tuma pa repara confianza cu aliado

Tension den un relacion historicamente fuerte

Inclusion di Hulanda den e lista ta politicamente sensitivo. Merca y Reino Hulandes tin un alianza di seguridad fuerte den region, incluyendo cooperacion aereo, base militar y operacion maritimo contra droga.

Echo cu un aliado cu tanto historia ta baha intercambio di inteligencia asina abiertamente ta mustra profundidad di e conflicto diplomatico y preocupacion internacional tocante falta di transparencia den e atake cu misil. Mientras polemica ta crece, preshon ta aumenta riba Washington pa hustifica nan accion y restoura confianza cu e socio mas cercano.