Winklaar : Summer School ta sigui y ta evalua expansion di su funcionamento

ORANJESTAD - Dialuna tabata e prome dia di Summer School 2015, un programa desaroya pa yuda e “doorstromers” cu a gradua di MAVO y ta bay cuminsa HAVO 4 den e aña escolar 2015/2016. Minister di Enseñansa Michelle Hooyboer-Winklaar tabata di bishita na Colegio San Nicolas riba e prome dia di e programa cu lo dura 2 siman. Summer School ta ofrece e hobennan un “insight” den diferente vak cu tradicionalmente a prueba di presenta dificultad ora nan drenta scol. Minister Hooyboer-Winklaar a bisa cu ta enfoca un poco mas riba e vaknan aki pa asina e hobennan sinti nan mes un poco miho prepara.

COLEGIO SAN NICOLAS

Como cu Colegio Arubano no tabata dispuesto pa ofrece e Summer School e aña aki Colegio San Nicolas a tum’e over, pasobra cu hecho ta cu si wak e resultadonan di aña pasa por conclui cu e programa ta util y mester sigui cune. E mandatario a splica cu anteriormente semper ta papia di menos di 50% di e doorstromers cu ta bay over di HAVO 4 pa HAVO 5, pero den e caso di e hobennan cu a atende Summer School aña pasa y a haci uzo di servicionan provee pa fondonan di gobierno pa extra guia, a nota cu 70% di nan a bay over di HAVO 4 pa HAVO 5 na fin di aña escolar 2014/2015.

GRUPO GRANDI

Minister Hooyboer-Winklaar tabata contento di wak cu dialuna tabatin un grupo grandi di studiante entusiasma pa cuminsa e programa; nan a wak un bentaha den dje y ta invertiendo nan tempo pa sinti nan mes miho prepara. El a expresa cu e tin admiracion pa e madurez cu nan ta desplega cu e decision aki. E cantidad di participante ta mesun grandi cu e grupo di aña pasa, pero e biaha aki ta un combinacion di studiante di tanto Colegio San Nicolas como Colegio Oranjestad.

GRADUADONAN DI MAVO

Minister Hooyboer-Winklaar a subraya e importancia di e opcion pa graduadonan di MAVO atende HAVO, como cu e grupo mas grandi di hoben cu ta bay scol secundario for di basisschool ta bay MAVO (60% di e total) y ora cu nan gradua mester tin mas opcion pa mas studiante cu solamente EPI of subi mercado laboral di biaha. Aki ta trata di hobennan di entre 16 y 17 aña y tin di nan cu kier sigui un estudio avansa, nan tin ambicion pa sigui studia mas leu den careranan cu no ta wordo ofreci na EPI y p’esei mes ta asina importante pa ofrece mas hoben e opcion pa bay HAVO.

EXPANSION

E titular di enseñansa a splica cu tin plannan tambe pa den futuro expande riba e concepto di Summer School pa ofrece e studiante cu a keda sinta pa un of dos vak e oportunidad pa haci e vak(nan) aki di nobo pa purba “haal” e/nan y toch sigui pa e siguiente grado. E concepto aki tin beneficio den e sentido cu e hoben ta traha den un grupo mas chikito, cu un enfoke mas grandi y asina por logra evita di mester haci ful un aña y tur vak di nobo pa via di un of dos vak so.