Nicolas Maduro: No lo por vence Venezuela den medio di tension pa despliegue militar di Merca

CARACAS - Dialuna 23 di november, hefe di regimen di Venezuela, Nicolas Maduro, a bisa cu “no lo por” vence su pais, den medio di tension despues di despliegue militar di Merca den laman Caribe, y den medio di decision di Departamento di Estado pa designa e yama Cartel di Soles como organizacion terrorista stranhero. Den su ultimo declaracion, Maduro a evita pronuncia tocante Cartel di Soles, mentras administracion di Donald Trump ta asegura cu e ta e lider hunto cu alto mandonan di ehercito y gobierno di Venezuela. “Haci loke nan haci, unda nan haci’e, no lo por vence Venezuela. Nos ta invencible. No a por ni no lo por nunca cu nos patria”, Maduro a bisa den su programa semanal ‘Con Maduro+’, riba canal estatal VTV. E la destaca tambe cu e pais ta ricibi hopi apoyo “na tur banda” contra “amenaza psicologico, politico y diplomatico” di banda di Merca.

DESIGNACION DI CARTEL DI SOLES COMO ORGANIZACION TERRORISTA

Den e ultimo ora, Departamento di Estado a confirma designacion oficial di Cartel di Soles como grupo terrorista stranhero, loke ta duna administracion Trump herramienta adicional pa aumenta presion riba gobierno di Maduro y logra sak’e for di poder. Pese cu Merca ta asegura cu Cartel di Soles ta forma principalmente pa militarnan venezolano desde añanan 1990, investigacionnan di DEA no a bira oficial te maart 2020, durante e prome mandato di Donald Trump. E momento ey Departamento di Husticia a reconoce formalmente existencia di e grupo cu, segun nan, ta wordo dirigi pa Maduro y minister di interior y husticia, Diosdado Cabello. Gobierno di Venezuela dialuna a rechasa designacion di Merca di yama Cartel di Soles como grupo terrorista, y a bisa cu e organizacion aki ta “inexistente”, y cu e administracion Trump ta ripiti un “mentira vil” pa hustifica un intervencion, segun comunicado di Cancilleria na Caracas.

PARTIDO OPOSITOR TA PIDI SALIDA INMEDIATO DI MADURO

Partido opositor a publica 9 punto riba kico “pais ta exigi” pa democracia y pa instalacion di un “Gobierno di Unidad Nacional”. Den un documento riba cuenta oficial di X di partido ‘Primero Justicia’, nan a detaya peticion pa saca Maduro for di poder. Plan ta inclui instalacion di un “Gobierno di Unidad Nacional amplio, plural y cu rol ciudadano”, pa permiti desarrollo y aplicacion di un “transicion democratico”.