Parlamentario na Corsou kier pa pone “the blue wave” riba plachinan di number nobo di auto

WILLEMSTAD – “Ainda tur hende ta celebra con seleccion di futbol di Corsou a marca historia dor di posiciona Corsou pa Mundial 2026. Tur dia ainda rond mundo hendenan ta papiando di Corsou”, parlamentario Sheldry Osepa den carta na minister di VVRP ta pidi pa pone “the blue wave” riba plachinan di number nobo di auto. E propaganda pa nos dushi Corsou ta impagabel. Corsou, un isla chikito drumi den laman Caribe, a bolbe haci un hazaña cu pais grandi por solamente soña cune. Pesey den e dianan aki pueblo di Corsou no ta canta mas: “Tula warda, no wak ainda”, pero e generacion nobo cu orguyo ta canta awor: “Mama, wak unda nos a yega!”

Osepa ta sigui dicando cu e experencia grandioso aki caminda Corsou ta e isla di mas chikito den mundo cu ta bai mundial, mester wordo graba pa semper den nos mente. E mester ta un estimulo pa tur generacion cu ta bini. E evento aki mester laga nos corda di diferente deportistanan cu a lucha y habri portanan pa cu ora e porta internashonal habri, hopi generacion lo siguini drenta. Ken por lubida Hensley “Bam Bam” Meulens cu a haci su MLB debut na 1989 cu New York Yankees? Awe 36 aña despues Corsou ta un isla internacionalmente respeta den baseball. Y nos sa cu futbol tambe lo pasa mesun cos. Pesey mes e logro di Corsou pa bai mundial mester wordo registra tur dia den nos corazon. Tur hoben yiu di Corsou mester sa cu nan tambe tin talento y capacidad pa hunga futbol riba e nivel mas halto den mundo.

Un manera pa sigura cu tur hende desde awor pa dilanti lo keda corda e momentu grandioso caminda Corsou a demostra determinacion, disciplina y capacidad, ta pa grava riba nos plachinan di number di auto e palabra: “the blue wave”. Mirando cu gobierno tin intencion pa na aña 2027 introduci plachinan di number nobo di auto, mester wak e posibilidad pa usa esaki pa marca cu historia e logro grandi pa Corsou. Usa plachi di number pa marca y corda momentonan historico no ta nada strano ni nobo. Osepa ta bisa cu tin ehempel den United Arab Emirates, China, Singapore y Merca. Tin pais ta saca moneda special, pero plachi di number tambe por usa pa pueblo semper keda corda.