DIMP a alerta pa mensahe di SMS falso circulando relaciona cu ‘pago di restitucion’

ORANJESTAD – Dialuna Departamento di Impuesto a ‘bati alarma’ pa un caso cu a cuminsa mira luz di dia. “Awe personanan no autorisa a cuminsa manda mensahe via SMS uzando nomber y logo di Departamento di Impuesto” e mensahe di e departamento ta cuminsa bisa. “E mensahe ta persuadi personanan pa "no perde tempo" y pa nan pidi nan restitucion fiscal den forma digital. Den e SMS tin un link pa haya mas detaye”. DIMP ta alerta tur contribuyentenan cu e mensahe di SMS aki no a Sali for di departamento di impuesto. E ta un ‘scam’ y actualmente investigacionan ta tumando lugar. DIMP ta pidi tur contribuyente pa no habri e link. Si acaso a habri e link, por fabor no yena ningun dato den e formulario digital. Esaki ta hopi peligroso pasobra bo datonan personal lo por cay den man di personanan no autorisa cu mal intencion. 

NUNCA

Departamento di Impuesto a sigura cu nunca nan lo pidi contribuyentenan pa yena nan datonan personal via tipo di formularionan asina. “Sea ta un SMS of un e-mail, please no habri ningun link. Ta consehabel pa semper verifica cu nos prome.  Nos ta pidi nos contribuyentenan pa comparti e mensahe aki cu conocinan pa asina preveni mas hopi posibel cu datonan confidencial ta cay den man di criminalnan cibernetico cu ta uzando nomber y logo di Departamento di Impuesto” e departamento a finalisa bisando.