Herdé: Terenonan na Colony y Burunbundo tin un potencial pa vivienda na Aruba

ORANJESTAD – “ E terenonan na Colony y Burunbundo tin un potencial enorme pa por bin cu ideanan revolucionario riba tereno di infrastructura y amplia e vision encuanto trahamento di vivienda na Aruba e.o. traha barionan na luga di casnan individual, traha vivienda den edificionan vertical y no solamente horizontal” Esaki ta pensamento di minister encarga cu vivienda, drs Rene Herdé. E la haci un recorido recientemente rond di Aruba ‘en busca di tereno’ pa por yuda mitiga e problema. 

PNI

E mandatario a haci esaki den cuadro di Plan Nacional di Infrastructura (PNI), y no a haci esaki su so, sino den compania di varios experto local riba tereno di Infrastructura, hunto cu arkitecto di paisahe renombra Hulandes Paul van Beek y Charles Vermaas cu ta un diseñador di ciudad y paisahe. 

RETO

Un di e retonan di mas grandi cu Aruba ta enfrenta actualmente ta esun di vivienda. Tin diferente factor cu a conduci na e problematica aki. Segun Herdé, varios departamentonan a wordo neglisha pa basta tempo, incluyendo e departamentonan encarga cu Infrastructura DLV, DIP y DOW.  “ E mal maneho di e departamentonan tin como consecuencia cu e tramitenan pa haya tereno y financiamento na final ta ocasiona un obstaculo pa logra traha un cas. Antes na Aruba nan tawata otorga tereno basta grandi, cu consecuencia cu awo tin scarcedad di espacio pa construi vivienda”. 

TERENO DISPONIBEL

Durante e recorido a bishita e tereno na Port City (Aruba Ports Authority), despues a bay Colony y pa finalisa a bishita un tereno na Burunbundo. Segun e mandatario, e terenonan aki tin un potencial enorme pa por bin cu ideanan revolucionario riba tereno di infrastructura y amplia e vision encuanto trahamento di vivienda na Aruba e.o. traha barionan na luga di casnan individual, traha vivienda den edificionan vertical y no solamente horizontal. 

CON POR LOGRA E CAMBI

Segun Herdé, pa facilita e proceso di haya tereno, financiamento, traha cas etc. mester cuminsa na diferencia e situacion y necesidad di cada persona individualmente. Un famia cu ta consisiti di mama, tata y 2 yiu su vivienda no por ta mesun tamaño cu un persona di edad avansa cu ta biba su so.   “ E meta ta pa trece un solucion na e problematica di vivienda y yuda pueblo di Aruba, no obstante nan entrada financiero, pa por alcansa e soño di por tin nan mesun hogar”.