Investigacion riba caso di Mitch Henriquez lo dura algun luna

DEN HAAG – E investigacion di rijksrecherche riba e caso di arubiano Mitch Henriquez lo dura sigur algun luna mas. Asina e minister di husticia di Hulanda, Ad van der Steur a contesta dos parlamentario di partido SP siman pasa. “Unabes cu e resultado ta conoci, lo participa esaki” e mandatario a sigura e parlamentarionan hulandes.

CARTA PA MANDATARIO

Den un carta dirigi pa e mandatario, dos parlamentario di e partido SP, Kooiman y van Nispen a manda 6 pregunta pa e mandatario relaciona cu e caso (lesa e pregunta y contestanan aki). Entre e preguntanan, ta figura e ‘cambio di version di ministerio publico riba e caso, e forma con polis hulandes a actua, y mas. Mientras cu mayoria di pregunta a wordo wanta pendiente e investigacion, algun si a haya contesta. Entre nan, e tempo cu lo dura prome cu e investigacion termina.

ENTRENAMENTO DI POLIS

Loke tambe a haya contesta, ta e pregunta riba nivel y entrenamento di polis den casonan manera esun di e defunto Henriquez. Riba esaki, e mandatario a contesta cu ‘Tur funcionario di polis den e entrenamento basico, ta haya esaki den forma di ‘maneho pa salba bida’ via e entrenamento di prome auxilio door di polis. Ta duna indicacion na e funcionario policial con pa duna prome auxilio y pa determina eynan te na ki punto, asistencia medico ta necesario.

E CASO DI MITCH HENRIQUEZ

E caso lamentable di e arubiano Mitch Henriquez (42) a tuma lugar dia 28 di juni na Hulanda despues di un confrontacion cu polis hulandes. Henriquez, manera ta conoci caba awor,  a wordo aresta cu man duro door di polis na Zuiderpark na Den Haag durante un evento musical. E motibo segun Ministerio Publico ta, cu e persona lo a bisa cu e tin un arma cu ne. Mientrastanto den curso di e siguiente dia, esta diadomingo, a ricibi e noticia lamentabel cu  Henriquez a fayece despues na hospital. Rijksrecherche bou guia di Ministerio Publico na Den Haag a cuminsa cu un investigacion di e detencion.  E curpa mes di Henriquez a yega Aruba dia 7 di juli ultimo y e la wordo dera 9 di juli.